Lawngtlaiah Bawrhsap leh UNICEF team te’n hriselna kaihhnawiha hma lak ho dan tur an sawi ho

Vawiin khan Lawngtlai DC Conference Hall-ah Lawngtlai Bawrhsap Dr Andrew H. Vanlaldika hovin District Administration, Health Department official leh United Nations Children’s Fund (UNICEF) team te chuan Lawngtlai District chhunga hriselna kaihhnawih harsatna hrang hrang leh a su kiang tura hma lak ho dan tur an sawi ho.

Lawngtlai Bawrhsap Dr Andrew H. Vanlaldika hma laknain Lawngtlai District-a hri danna pek zat leh damdawi ina nau nei zatin duhthusam a phak lohnaah UNICEF atangin chhawmdawlna leh tanpuina dil a ni a. Hemi atana a hmuna District dinhmun zir chiang tur leh ruahmanna siam turin UNICEF team chuan Lawngtlai District rawn tlawhin, an zir chianna atanga an thil hmuh chhuahte chu he hunah hian thlir ho a ni a. Hma lak zui dan tur sawi ho nghal a ni.

UNICEF atanga chhawmdawlna leh tanpuina atan hian vaccine pek chungchangah inkal pawhna kawng chhia leh power supply vanga harsatna sut kian nan lirthei, lawng leh inverter mamawhna thlen a ni a. Damdawi ina nau nei an pun theih nan hmanraw mamawh leh thiamna lama tihchangtlunna tur te thlen a ni bawk.

UNICEF atanga Lawngtlai District dinhmun zir chiang tura lo kalte hi Dr Arjam Rebecca Aharma, Behaviour Communication Change Consultant; Dr Shubhangi Pandagre, State Public Health Immunisation Consultant leh Jammejaya Meher, State Consultant & Rural Immunisation te an ni a. An zir chianna atang hian ruahmanna siamin, a tul danin hma an la zui dawn a ni.

 

Issued by:I&PRO, Lawngtlai