Lawngtlaiah Fire Prevention Week 2022 hawn a ni

Vawiin khan Fire Prevention Week (Kangmei Ven Hapta) 2022 chu Lawngtlai Bawrhsap pisa tualah Lai Autonomous District Council-a Chief Executive Member Pu V. Zirsanga chuan a hawng.

LADC CEM Pu V. Zirsanga chuan kangmei vanga ramngaw a chereu nasatzia leh boruak a bawlhhlawh telh telh thu sawiin, ngaw siam belh piah lamah ngaw awm sa humhalh nan kangmei ven kawnga tha tawp chhuah zel chu tihmakmawh a nih thu a sawi a. District mipuite chu sawrkar leh tlawmngai pawlte hma lakna thlir mai lo leh mi dang kova mawhphurhna nghat mai lo tura chahin, mi pakhat thil tha tihin rah duhawm tak a chhuah thei tih leh “Kangmei ven hi mi tin mawhphurhna a ni” tih hre chunga pheikhai rual taka kangmei ven kawnga tang tlang turin a chah bawk.

Kangmei Ven Hapta hawnna hi Lawngtlai District Level Committee on Fire Prevention (DLCFP) Chairman, Lawngtlai Bawrhsap Dr Andrew H. Vanlaldika’n kaihruaiin, Lairam Higher Academy of Science (LAHAS) Principal Rev. C. Chanchinmawia chuan hunserh a hmang a. Chairman kaihhruaiin mipui kal khawmte chuan ram tikang lo tur leh ramngaw leh nungchate humhalh tura thutiam an sawi rual a. DLCFP Member Secretary, LADC-a District Council Conservator of Forests Pu K. Lalromawia’n report pein, Chhimtuipui Wildlife Division-a Deputy Conservator of Forests Pu C. Lalrinmuana’n lawm thu a sawi bawk.

Vawiin Fire Prevention Week hawnnaah hian sawrkar department hrang hrang leh LADC-a officer te, VC leh tlawmngai pawl ai awhte leh chanchinbu mite an tel a ni.

Fire Prevention Week hi Mizoramah kum 2000 atang khan hman tan niin, kumin hi a tum 23-na a ni a. Kum 2009 atang khan district leh village level fire prevention award sem tan niin, Mizorama district hrang hrang zingah Lawngtlai District hi kum 2010 & 2015-ah pakhatna, kum 2019-ah pahnihna leh kum 2014-ah pathumna a lo ni ve tawh a ni.

Kum 2015 atang khan Forest Survey of India (FSI) chuan satellite hmangin kangmei chhuak a awm leh awm loh vil tanin, fire alert a thawn chhuak thin a. Nikum (November, 2020 – May, 2021) chhung khan Mizorama kangmei chhuak a chhinchhiah zat chu 4,486 niin, ram kang zau zawng chu hectare 14,153.08 a ni a; chu’ng zingah chuan lo hal 4,281 (hectare 11,590.90) awmin, ramngawa kangmei chhuak 205 (hectare 2,562.18) a awm thung. Lawngtlai District bikah lo/huan hal 611 awmin, a zau zawng chu hectare 313.59 a ni a; ramngaw kangmei chhuak hectare 17-a zau a awm bawk.

Issued by: I&PRO, Lawngtlai