Lawngtlaiah MzSRLM hnuaiah SHG leh SHG member-te tan poster slogan leh waste to art intihsiakna buatsaih a ni

 Mizoram State Rural Livelihoods Mission (MzSRLM) hnuaia Lawngtlai District chhunga self help group (SHG) leh SHG member-te tana au hla mit la (poster slogan) insiamsiak leh hnawmhnawk atanga hman tangkai theih thil (waste to art) insiamsiak buatsaih chu vawiin khan Lawngtlai DC Conference Hall-ah endik leh lawmman semna hun hman a ni.

 

Chawhma lamah Lawngtlai District chhunga RD Block hrang hrang hnuaia SHG-te thil siam pho chhuah chu Chief Judge Er Netralal Jaisi, Executive Engineer, PHED hovin judge-te’n an endik a. Tlai dar 3:30-ah DRDA Lawngtlaia Project Director Pi Marilyn Rualzakhumthangi kaihhruaiin lawmman semna hun hman zui a ni a. He hunah hian District Bawrhsap Dr Andrew H. Vanlaldika chu Khuallian niin, LADC-a Sanitation changtu Executive Member Pu Lalropuia Chinzah chu Khual zahawm a ni a. Khuallian, khual zahawm leh chief judge te hnen atanga thu sawi ngaihthlak niin, intihsiakna lawmman sem a nih bakah, Lawngtlai khawpui chhung veng hrang hranga faina ambassador-te hnenah chawimawina thilpek hlan a ni bawk.

 

He intihsiakna, “Competition on water and sanitation for SHGs & SHG members under MzSRLM, Lawngtlai District”-ah hian category pathum awmin, District chhung RD Block hrang hrang hnuaia SHG-te’n an thil siam mawi tak tak an theh lut a. Chumi atanga a ti tha zual thlan chhuahte hnenah lawmman pek a ni.

 

Category-I chu inthiarna tha leh thianghlim chungchang inzirtirna au hla mit la insiamsiak (designing of poster slogan on importance of clean & functional toilet) niin, Category-II chu tui thianghlim pawimawhna leh tui hna humhalh chungchang inzirtirna au hla mit la insiamsiak (designing of poster slogan on importance of clean water & conservation of water source) a ni a, Category-III chu hnawmhnawk leh thil chhe paih mai tur atanga hman tangkai theih thil insiamsiak (skills competition using waste products) a ni thung.

 

Category-I-ah pakhatna chu Hammo SHG, Kamalanagar-III, Chawngte RD Block niin, pahnihna Chorgi SHG, Kamalanagar-II, Chawngte RD Block leh pathumna Dopawrha SHG, Mampui, Lawngtlai RD Block te an ni a. Chawngte RD Block hnuaia SHG panga – Charlene SHG, Saizawh West; SSB Colony B Group SHG, Bajeisora; Colony SHG, Bajeisora; Unity SHG, Kamalanagar-IV leh Sadak Fan SHG, Baganpara te chuan consolation prize an dawng bawk.

 

Category-II-ah pakhatna chu Zotuithiang SHG, Mampui, Lawngtlai RD Block niin, pahnihna Chawnpui SHG, Chawntlangpui, Lawngtlai RD Block leh pathumna Sadak Fan SHG, Baganpara, Chawngte RD Block te an ni a. Sem Sem SHG, Tuithumhnar, Lawngtlai RD Block; Abigail SHG, Saizawh West, Chawngte RD Block; Unity SHG, Kamalanagar-IV, Chawngte RD Block; B. Jeegir SHG, Palenasora, Chawngte RD Block leh Zamzo SHG, Vartekkai, Sangau RD Block te chuan consolation prize an dawng bawk.

 

Category-III-ah pakhatna chu Lalenkawli, Ainawn SHG, Sihtlangpui, Lawngtlai RD Block niin, pahnihna R. Lalkrospari, Samuel SHG, Sangau-II, Sangau RD Block leh pathumna Hmangaihzuali, Charlene SHG, Saizawh West, Chawngte RD Block te an ni a. Category hrang hrangah hian pakhatnain Rs 50,000/- leh citation, pahnihnain Rs 30,000/- leh citation, pathumnain Rs 20,000/- leh citation, consolation prize dawngtute’n Rs 5,000/- leh citation an dawng theuh a ni.

 

Issued by: I&PRO, Lawngtlai