Lawngtlai DIPRO office-in MJA Golden Jubilee pualin District MJA member-te lawmpuina thuziak an hlan
Lawngtlai District Information & Public Relations Office chuan Mizoram Journalists’ Association (MJA) Golden Jubilee pualin vawiin khan MJA Lawngtlai District member-te chu DIPRO office chamber-ah thingpui inpuiin, “lawmpuina leh duhsakna” thuziak an hlan.
He hunah hian Lawngtlai DIPRO Pu C. Lalhruaitluanga chuan MJA te’n tluang taka golden jubilee kum an thleng thei chu an lawmpui tak zet tih lantir nan lawmpuina leh duhsakna thuziak buatsaih a, an puala thingpui buatsaihsak an nih thu a sawi a. MJA member-te chu kawng chho zawha tlang chhip hmun thengthaw chuangkai ta anga inngai a, golden jubilee kum chu hahdam leh hlim taka hman tum tura chahin, chawlh erawh chawl hlen lo va, thlan sa a daih hnuah thui leh sang zawk thleng tura theih tawp chhuah chhunzawm zel turin a chah a, duhsakna a hlan nghal a ni.
District MJA President Pu Lalngheta Ralte chuan I&PR Department leh MJA te’n a tir aṭanga thawh hona ṭha tak nei a, pheikhai rual taka kum sawmngana an chuangkai dun thei chu lawmawm a tih thu a sawi a. Lawngtlaia District I&PR Office leh District MJA te thawh hona ṭhatzia chu ṭawngkaa sawi a ngai tawh lo va, programme eng emaw zat an huaihawt ho leh hun pawimawha an inṭawiawm ṭhin dan chuan ṭawngkain a sawi theih aia fiahin a puang a ni, a ti.
MJA Golden Jubilee lawmpuina leh duhsakna thuziak chu I&PR Lawngtlai District office hmingin Peon Pi K. Lalfakmawii chuan District MJA ai awha lo dawngtu President Pu Lalngheta Ralte kutah a hlan a. Hriat rengnaa nem kai tur thla lak ho niin, District I&PR office staff leh District MJA member-te chuan golden jubilee puala thingpui ruai buatsaih chu an kil ho zui a ni.
Vawiina Lawngtlai DIPRO Office-in MJA Lawngtlai District hnena MJA Golden Jubilee lawmpuina leh duhsakna thuziak an hlanah hian he thuziak hi a chuang a ni:
“LÂWMPUINA LEH DUHSAKNA
MJA GOLDEN JUBILEE
(23.03.1972 – 23.03.2022)
“Mizoram Journalists’ Association (MJA), Lawngtlai District-a thawhpui duh takte,
“Mizoram Journalists’ Association-in a thim a vâr thlu lo va, sik leh sa, fûr leh ṭhâl, muanglei leh râl ram, kawng zâl leh bumboh, nawm leh hrehawm kârah pawh tlâwmsan lo va, ram leh khawtlâng leh mipui tâna thu thar, bengvârthlâk, hlâwkpuiawm leh ṭangkai tak tak fawm khâwm, puah rem, thlit fîm leh theh darh kawnga in rawngbâwlna te, chumi zâra ram kalsiam khalh ngîl leh her rem a nih a, mipui sûkthlêk kaihhruai leh thlâkthleng a nih ṭhinna avâng te’n kan chhuang tak zet che u a. Thang leh fal leh khâm leh bang, dîp leh dâltu chhiar sên loh kâra khaihlak, bahlah leh petek lova kum sawmnga lai rinawm taka rawng in bâwl thei hi kan lâwmpui tak meuh che u a ni.
“MJA Golden Jubilee chibai bûk che uin, duhsakna kan hlân che u a. He kum hi rahbi pakhat atân hmang a, sâng leh thui zâwk thleng tûra tluang taka rahbi dang tuk belh zêl tûrin duhsakna kan hlân bawk a che u.
“Mahni rawng ni lo, mipui rawngbâwl zêl thei tûrin Khuanu’n hualhim zêl che u rawh se!
“C. LALHRUAITLUANGA, DIPRO & STAFF
DISTRICT INFORMATION & PUBLIC RELATIONS OFFICE, LAWNGTLAI
Dated Lawngtlai, the 16th March, 2022″
Issued by: I&PRO, Lawngtlai