Lawngtlaiah Bawrhsap hovin zirna ina COVID-19 hri leng laka himna tur SOP leh CAB ṭha taka zawm a nih theih dan tur sawi ho a ni

Vawiin khan Lawngtlai Bawrhsap Dr Andrew H. Vanlaldika hovin a office chamber-ah Lawngtlai District chhunga zirna in hawn ṭan a nih tak avangin zirna in leh hostel-ah te COVID-19 hri leng laka himna tur Standard Operating Procedure (SOP) leh Covid Appropriate Behaviour (CAB) te ṭha taka zawm a nih theih dan tur sawi ho a ni.

 

Bawrhsap Dr Andrew H. Vanlaldika chuan hri lengin ziaawm lam a pan deuh avangin zirna in leh hostel pawh a pangngaia hawn ṭan a ni a; chutih rualin hri leng a la kian fel loh avangin inthlahdah lo va, fimkhur sauh sauh a la ṭul tih a sawi a. Zirna in leh hostel-ah te School Education Department-in SOP a duan leh hri leng laka him tura khawsak phung ṭha (CAB) – hmai tuamna hman ṭhat, kut sil fai uar leh mi dang nena inhnaih chilh loh te ngaih pawimawh zui zel a ṭul thu sawiin, zirtirtu leh zirlai zinga hri danna la thei chinte’n mahni leh mi dang himna atana thil pawimawh tak a ni tih hriaa lak kim vek tum turin a chah a ni.

 

He hunah hian District Education Officer, Education Officer (LADC), Govt Lawngtlai College, DIET leh ANM School ai awhte an tel a. Zirna in leh hostel hawn ṭan a niha hri leng laka himna tur kawnga hma lakna kalpui mek leh hma lak zui zel dan tur te sawi ho a ni.

 

Lawngtlai DEO Pi R. Lalnunthari chuan sikul hotute hnenah SOP leh CAB zawm ṭha tura hriattirna leh an zawm tur inkaihhruaina an tihchhuah thu sawiin, a theih chin chinah fimkhur taka hma an lak thu a sawi a. Chawlhkar tin Nilainiah hmunpui lamah hri danna lak dan report an thawn ṭhin thu a sawi.

 

Zirna in leh hostel te’n an zawm tur SOP ruahman sa chu DEO-in a hnuaia zirna in hrang hrangah ṭha taka zawm tura hriattirna tichhuak thar leh se tih niin, LADC hnuaia zirna inah te pawh SOP leh CAB te ṭha taka zawm a nih theih nan EO te’n ruahmanna siamin, a ṭul danin hma lo la se, tih a ni a. College, DIET, ANM School leh training institute dangte pawhin sawrkarin ruahmanna a duante ṭha taka zawm a nih theih nan lo bawhzuiin, hma lo la se, tih a ni a. Hemi hmang hian a khat tawka endikna (surprise checking) kalpui ṭhin ni se tih niin, a zawm ṭha lo an awm chuan dan anga hma lak chhunzawm zel tum a ni.

 

Hri danna la thei chinte’n an lak kim vek theih nan school-a kal chilha hri danna pek theih dan tur pawh Health Department te nen ruahman a, hma lak zui tum a ni bawk.

 

Issued by: I&PRO, Lawngtlai