Lawngtlaiah District Level SEDP Governing Board an ṭhu khawm

Vawiin khan Lawngtlai District Level Socio-Economic Development Policy (SEDP) Governing Board chu an Chairman, Lawngtlai Bawrhsap Dr Andrew H. Vanlaldika hovin Lawngtlai DC Conference Hall-ah an ṭhu khawm a. Lai Autonomous District Council-a Agriculture changtu Executive Member Pu Lalropuia Chinzah pawhin a telpui.

 

Chairman Dr Andrew H. Vanlaldika chuan SEDP chu sawrkar flagship programme a nih angin line department-te chu theih tawp chhuah turin a chah a. A hlawhtlin ngei theih nan beneficiary-te pawh uluk taka vil zui a, an mamawh kaihhruaina ṭha pe turin a chah a ni.

 

He hunah hian Lawngtlai District chhung khaw tina Village Level SEDP Committee din dan tur sawi ho a ni a. Governing Board member-te’n May thla chawlhkar khatna ral hmain Board Chairman emaw, Member Secretary emaw hnenah khaw tina Village Level SEDP Committee ruhrel leh member tur rawtna theh lut se, Chairman leh Member Secretary te’n an lo thlitfim hnuah, Board ṭhut khawm kovin chutah chuan pawmpui turin chhawp chhuah ni se, tih a ni.

 

He hunah hian line department hrang hrangte chuan SEDP hnuaia hma lakna an kalpui tawh leh hmachhawp an neihte report an pe bawk a ni.

Issued by: I&PRO, Lawngtlai