Lawngtlaiah ram chhung hmun dang rualin “Mi Rethei Chawi Kanna Inkhawmpui” (Garib Kalyan Sammelan) hman a ni

India ramin zalenna a hmuh kum 75-na lawmna, “Azadi Ka Amrit Mahotsav” kal mekah vawiin khan Prime Minister Pu Narendra Modi hova India ram chhunga district zawng zawnga hman tura ruahman, “Mi Rethei Chawi Kanna Inkhawmpui” (Garib Kalyan Sammelan) chu ram chhung hmun dang rualin Lawngtlai District-ah pawh DC Conference Hall, Lawngtlaiah hman a ni.

 

Sawrkar laipuia Ministry hrang hrang 9 hnuaia mipui hamṭhatna tur ruahmanna (scheme/programme) hrang hrang 16-a hamṭhatna dawngtu (benficiary)-te nena inbiangbiakna atan te, he’ng scheme hrang hrangte’n khua leh tuite tana khawsak awlsamna a thlen dan hriat fiahna mai bakah, ṭangkai lehzual zawka mipuiin an chhawr theih dan tur rawtna awm theite hriatna atan te he Inkhawmpui hi buatsaih a ni a. Kum 2047-a India ramin zalenna a hmuh kum 100-na atana khua leh tuite hmathlir leh beiseite hriat theihna atan tih a ni bawk. 

 

Vawiina hi puala Lawngtlaia hun hman hi zing dar 9:45-ah ṭan niin, Additional DC Pu James Miahlung chuan a kaihruai a. Lawngtlai Bawrhsap Pu Amol Srivastava chuan inlawmna thu sawiin, sawrkar scheme hrang hrang hlawhtlinna chu beneficiary-te leh line department-te thawh rimna rah a nih thu a tar lang a, sawrkar, department leh mipui thawh hona avangin ramin hma a sawn zel dawn a ni, a ti.

 

He hunah hian scheme hrang hrang beneficiary leh line department hotute, VC ai awhte leh tlawmngai pawl hruaitute leh chanchinbu mite an kal khawm a.  District Rural Development Agency (DRDA) aṭangin Project Director Pi Marilyn Rualzakhumthangi chuan “Amrit Sarovar (tuikhuah siam) hnuaia Lawngtlai District-a hma lakna tlangpui” sawiin, SBI Lead Bank Office aṭangin Lead District Manager Pu Lallawmkima chuan “bank kal tlanga dawn theih hamṭhatna hrang hrang awmte” a sawi fiah bawk a. Department hrang hrang hnuaia scheme hrang hrang khawihtute’n scheme nihphung tlangpui tar langin, hamṭhatna dawngtu kal khawmte nen scheme ṭhatna te, scheme hlawhtlinna daltu harsatna awm ṭhin leh a sut kian dan tur te, a chhawr tur mipuite’n a nih dan tur taka an chhawr theih nana hmasawn ngaihna lai te sawi ho nghal a ni.

 

Prime Minister Pu Narendra Modi chuan National level Sammelan hi Shimla-ah a hmanpui a. He hunah hian hmaichhanah beneficiary-te kawmin, Kisan Samman Nidhi instalment 11-na a tlangzarh nghal a. Chawhma dar 11:00-ah Shimla aṭang hian biak-hmuh-theihna (video conferencing) hmangin India ram puma beneficiary-te biangbiakna hun hmang zuiin, he hun hi Lawngtlaia Sammelan hun hmanna hmun aṭang hian chhim chhunzawm nghal a ni a. Sub-Divisional Officer (Sadar) Pi TT Beikhaizi chuan lawm thu sawiin, hun khar a ni.

 

Vawiina hun hmanah hian he’ng a hnuaia scheme/programme hrang hrangte hi thlur bing a ni:

1) Pradhan Mantri Awaas Yojana (Grameen & Urban)

2) Pradhan Mantri Kisan Samman Nidhi

3) Pradhan Mantri Ujjwala Yojana

4) POSHAN Abhiyan

5) Pradhan Mantri Matru Vandana Yojana

6) Swachh Bharat Mission (Grameen & Urban)

7) Jal Jeevan Mission & AMRUT

8) Pradhan Mantri SVANidhi Scheme

9) One Nation One Ration Card

10) Pradhan Mantri Garib Kalyan Anna Yojana

11) Ayushman Bharat PM Jan Arogya Yojana

12) Ayushman Bharat Health and Wellness Centre

13) Pradhan Mantri MUDRA Yojana

 

Issued by : I&PRO, Lawngtlai