Lawngtlaiah District chhunga SEDP kalpui dan tur inhrilhfiahna hun hman a ni

Vawiin khan Lawngtlai DC Conference Hall-ah Lawngtlai District chhunga Village Level SEDP Committee member-te tan sawrkar flagship programme, Socio-Economic Development Policy (SEDP) kalpui dan tur inhrilhfiahna (sensitisation drive on implementation of SEDP) buatsaih a ni.

 

He hun hi Lawngtlai District Level SEDP Committee Member Secretary & DRDA Project Director Pi Marilyn Rualzakhumthangi chuan a kaihruai a. District Level SEDP Committee Chairman & Lawngtlai Bawrhsap Pu Amol Srivastava chuan khuhhawnna thu sawiin, SEDP chu sawrkar ruahmanna pawimawh tak a nih avangin line department leh village level committee te’n a hlawhtlin ngei theih nan theih tawp chhuah turin a chah a. Lawngtlai District chhunga a dawngtute’n eizawnna ngelnghet bul ṭan nan an hman ngei a beisei thu a sawi.

 

Line department ai awhin, AH&Vety Department aṭangin Veterinary Officer Dr Charlie C. Chawngthu chuan department-in SEDP an lo kalpui tawh dan report a pe a. District Level SEDP Committee ai awhin Member Pu Lalramliana Colney pawhin thu sawiin, village level committee ai awh kal khawmte chu SEDP hma lakna a tak taka thawk tur leh tihlawhtling thei tur thlang turin a chah.

 

District Level SEDP Committee Member & Sub-Divisional Officer (Sadar) Pi TT Beikhaizi chuan SEDP kalpui chungchanga hriat tur pawimawhte a lem nen entirin a sawi fiah a. SEDP thil tum chu “Mahnia eizawnna bul ṭan nan leh he’ng eizawnna kalpui mekte’n hma an sawn zel nana an hman tur ṭanpuina pek a, Mizoram chhunga mimal leh chhungkua, a tam thei ang ber dinhmun ṭha zawka hlan kai” a nih thu a sawi a. Zawhna leh chhanna leh sawi hona hun hman zui niin, SEDP Nodal Officer & Sub-Deputy Commissioner Pu H. Vanlalbiakzauva chuan lawm thu sawiin hun a khar a ni.

 

Family oriented SEDP hi thawh (phase) hrang hranga kalpui tura ruahman niin, a thawh khatna (1st phase)-ah hian MLA constituency tinah chhungkua 1,500 huam tura ruahmanna siam phawt a ni a. Line department 9 hnuaiah trade hrang hrang thlan tur awmin, beneficiary turte chuan Form 1 hmangin mahni khuaa Village Level SEDP Committee-ah dilna theh lutin, hei hi District Level Committee-ah thlen chhawn leh tur a ni a. Chumi aṭang chuan beneficiary tur hi thlan tur a ni.

 

Issued by : I&PRO, Lawngtlai