Lawngtlaiah State Anti-Tobacco Day hman a ni

Vawiin khan National Tobacco Control Programme (NTCP), Lawngtlai District buatsaihin 9th Mizoram State Anti-Tobacco Day chu Thingkaha DIET Lawngtlai hmunah hman a ni.

 

State Anti-Tobacco Day hi kum tin September ni 11-ah hman ṭhin a ni a. Kuminah erawh remchan zawkna avangin September ni 12-ah hman a ni a. Thupuiah “Zuk leh hmuam laka zirlaite ven him” tih chu hman a ni.

 

Vawiina hun hman hi DIET Principal leh Anti-Tobacco Squad Member Pi Ngur Hming Liani Chinzah chuan kaihruaiin, an institution-a Mizoram State Anti-Tobacco Day hman a ni chu lawmawm a tih thu a sawi a. DIET-a zirlaite chu nakin lawka zirtirtu tur an la nih avangin zuk leh hmuam laka zirlaite ven him pawimawhzia an lo zir lawk a ṭul a ni, a ti a. DIET huam chhungah zuk leh hmuam khuahkhirh tlat a nih thu a tar lang bawk.

 

NTCP District Nodal Officer Dr S. Thaizi chuan MSATD pual hian zuk leh hmuamin taksa a nghawng theih dan leh vaihlo hmanin thisen sang leh stroke a thlen theih dan te a sawi fiah a. Zuk leh hmuamin mimal leh chhungkua a nghawng dan te sawi bawkin, chhungkuaah meizial zu an awm chuan an fateah vaihlo ngaihzamna a thlen a, chu chuan an puitlin hnuah vaihlo zuk leh hmuam laka fihlim lohna a thlen ṭhin a ni, a ti a. Global Youth Tobacco Survey 2019-in Mizorama zirlai 1,401 zingah zir chianna (survey) kalpuiin, chu’ng zinga 58% chu zuk leh hmuam lakah an fihlim lo tih sawiin, Lawngtlai District chhunga zirlaite chu an rilru siam fel a, zuk leh hmuam laka fihlim tum turin a chah a ni.

 

He hunah hian NTCP Counsellor Pu Vanlalngheta kaihhruaiin zirlaite chuan zuk leh hmuam laka fihlim tura intiamkamna an sawi rual a. NTCP District Consultant Dr Christine Chhuanmawii chuan lawm thu sawiin hun a khar a ni.

 

Issued by: I&PRO, Lawngtlai