Lawngtlaiah khawpui chhung faina kawnga hma lakna tur hrang hrang sawi ho a ni

Vawiin khan Lawngtlai Bawrhsap Pu Amol Srivastava hovin Lawngtlai DC Conference Hall-ah Lawngtlai khawpui chhunga faina kawnga hma lakna tur hrang hrang sawi ho a ni a. LADC-a Sanitation changtu Executive Member Pu Lalropuia Chinzah bakah, state sawrkar leh LADC hnuaia a kaihhnawih department official-te an tel.

 

He hunah hian Lawngtlai khawpuiah faina kawnga hmasawnna tluantling a awm theih nana hma lakna tur rawtna hrang hrang thlir ho a ni a. LADC Sanitation Department-in khawpui chhung bawlhhlawh an khawn khawm dan leh an thehthang dan thlir ho niin, hmasawnna tur awm theite sawi ho a ni a. Bawlhhlawh paihna hmun ruat sa ni lova bawlhhlawh thehthang mai mai a awm loh nana mipuia zirtirna kalpui chungchang te, bawlhhlawh thliar hran chungchang te, bawlhhlawh ṭawih thei lo sawngbawlna leh bawlhhlawh ṭawih thei chi sawngbawlna hmun buatsaih dan tur chungchang leh hman khat daih sarang (single use plastic) hman titlem tura hma lak dan tur te sawi ho a ni.