Lawngtlaiah Excise & Narcotics Minister Dr K. Beichhua hovin Nasha Mukt Bharat Abhiyaan 2.0 hawnna hun hman a ni
Sawrkar Laipuiin ram pum huap ruihhlo do beihpui thlak a kalpui tur, “Nasha Mukt Bharat Abhiyaan 2.0” chu vawiin khan Government Lawngtlai College Hall-ah Mizoram Sawrkara Excise & Narcotics changtu Minister Dr K. Beichhua chuan a hawng.
Dr K. Beichhua chuan kum 2021-ah Sawrkar Laipui chuan ruihhlo do beihpui thlakna tur, Nasha Mukt Bharat Abhiyaan a kalpui tawh thu sawiin, Mizoram chhunga hman khawloh theih ruihhlo (drug) hluarna – Lunglei, Lawngtlai leh Mamit-ah te he ruihhlo do beihpui thlak hi chak taka kalpui a nih tur thu a sawi a. He’ng district khawpuiah te hian Bawrhsap chairman-na hnuaiah Ruihhlo Do Committee din vek a nih tur thu sawiin, Committee-ah chuan official-te bakah, tlawmngai pawl hrang hrang leh kohhran ai awhte an tel tur thu a sawi.
Dr K. Beichhua chuan Mizoramah drug a hluar avangin ṭhalai zingah HIV/AIDS vei an pung nasa hle tih sawiin, heti taka kan rama chhiatna hlir rawn thlentu ruihhlo do tur hian kan zavaia kan ṭan tlan a ngai a ni, a ti a. Mipuite’n ruihhlo zuar kan hriat a, thuneitute hnena kan report hian nasa takin hna thawktute kan ṭanpui a, ram tan hna ṭangkai tak kan thawk a ni tiin, ruihhlo tirem tura theih tawp chhuah turin mipui zawng zawng a sawm nghal a ni.
He huna thu sawitu dang Lai Autonomous District Council (LADC)-a Chief Executive Member Pu V. Zirsanga chuan ruihhlo hluarna apiangah nun a ralmuang lo va, ruk ruk leh tualthah a tam ṭhin tih sawiin, LADC huam chhungah ṭhalaite nun tichhe tura ruihhlo la lut man an nih chuan na taka chhan let an ni dawn tih a sawi a. Tun aṭanga kum nga a ral leh meuh chuan Mizoramah ruihhlo vanga boral ṭhalaite’n thlanmual an luah khat vek ang tih a hlauhthawnawm hle a ni tiin, ngawi renga ṭhalaite nunna laksak mektu ruihhlo chu ram pum huapa do a ngai tak zet a ni, a ti.
He hun hi Lawngtlai Additional Deputy Commissioner Pu James Miahlung chuan a kaihruai a. UPC (NEI) Lawngtlai West District-a District Secretary Rev. Lalsawmliana Sailo chuan hunserh hmangin, Bawrhsap Pu Amol Srivastava chuan kal khawmte lawmna thu a sawi a. Additional Superintendent of Police Pu C. Lalruatkima kaihhruaina hnuaiah ruihhlo ti lo tura intiamna pledge sawi rual a ni bawk.
He hunah hian Excise & Narcotics Station, Lawngtlaia Officer-in-Charge Pu Lalrengpuia chuan report pein, kum 2019 November thla aṭanga kumin 2022 September thla thlengin Lawngtlaiah ruihhlo avanga case register 420 a awm tawh thu a tar lang a. Tun dinhmunah ruihhlo chi khat, No. 4 chu Lawngtlai khawpuiah buaipui tham awma an hriat thu a tar lang bawk.
Vawiin hun hmanah hian LADC-a EM leh MDC-te bakah, Sawrkar official-te, political party hruaitute leh tlawmngai pawl hruaitute an tel a ni.
Vawiin khan Nasha Mukt Bharat Abhiyaan hma lakna pual hian Lawngtlai District chhunga Sawrkar office leh zirna inah te ruihhlo laka fihlim tur leh do tura intiamna (pledge) hi sawi rual a ni bawk.
Issued By: I&PRO, Lawngtlai