Lawngtlaiah District Level RTI Training buatsaih a ni

Vawiin khan Deputy Commissioner Office, Lawngtlai leh Administrative Training Institute (ATI), Mizoram te ṭang kawp huaihawtin Lawngtlai DC Conference Hall-ah District Level Training on Right to Information (RTI) Act, 2005 buatsaih a ni a. Lawngtlai Bawrhsap Pu Amol Srivastava chuan Khuallian niin hun a hmanpui.

 

Bawrhsap Pu Amol Srivastava chuan training khuhhawnna thu sawiin, RTI Act chu sawrkar inrelbawlna ṭha leh lang tlang a awm theihna tur leh sawrkar leh mipui inkara inrin tawnna a awm theih nana hmanraw pawimawh leh ṭangkai tak a nih thu a sawi a. RTI Act chuan mipuiin an dil kher nghak lova mipui hriat awm chi puanzar ngaite puangzar zung zung turin sawrkar thuneitute a phut tih sawiin, RTI chu phurrit leh hna tibuaitua ngai lo va, sawrkar hna peng pawimawh tak a ni tih hre reng turin training tura kal khawmte chu a chah a. Lawngtlai District chhunga hlawhtling zawka RTI kalpui a nih theih nana training buatsaih chu hman ṭangkai tum tur leh mahni thawhna department ṭheuhvah RTI-in a phutte hlawhtling taka kalpui tum ṭheuh turin a chah a ni.

 

Training khuhhawnna hun hi Lawngtlai Additional Deputy Commissioner Pu James Miahlung chuan a kaihruai a. Training-ah hian Lawngtlai District chhunga sawrkar department hrang hrang leh Lai Autonomous District Council)(LADC) hnuaia Departmental Appelate Authority (DAA), State Public Information Officer (SPIO) leh State Assistant Public Information Officer (SAPIO) te an tel a ni.

 

He Training-ah hian RTI Act District Resource Person (DRP)-te – Pi Malsawmtluangi, Superintendent, DC Office, Lawngtlai leh Pu H. Peter Lalremruata, Assistant Professor, Government Lawngtlai College te chuan thupui ṭhen hrang hrang, “Overview of RTI Act, 2005”, “Role of SPIO and SAPIO”, “Online RTI” leh “Functions of Mizoram Information Commission” tih hmang te’n zirtirna an pe a. Zawhna leh chhanna leh sawi hona nen hlawk takin hun hman a ni a. Tlai lamah Bawrhsap Pu Amol Srivastava hovin certificate semna hun hmangin, training hi khar a ni.

 

Issued by: I&PRO, Lawngtlai