Union Minister of State for Minority Affairs Pu John Barla hovin Lawngtlaia hmasawnna hna thawh hrang hrang thlir ho a ni

Zan hnih riaka Mizoram lo tlawha cham mek, Union Minister of State for Minority Affairs Pu John Barla chuan vawiin khan Lawngtlai tlawhin, hmasawnna hna thawh mek leh hmunhma pawimawh ṭhenkhat a tlawh bakah, Lawngtlaia Sawrkar Laipui ruahmanna hnuaia hmasawnna hna thawh hrang hrang thlir hovin Head of Office-te review meeting a neihpui.

Union Minister of State Pu John Barla hi District Council & Minority Affairs Secretary Dr Lalrozama, IAS chuan lo ṭawiawmin, Lawngtlai Helipad-ah Lawngtlai Bawrhsap Pu Amol Srivastava, IAS hovin District Administration leh Police lam official-te’n an lo dawngsawng a. State leh Lawngtlai District BJP hruaitute’n an ṭawiawm bawk a ni.

Pathianni a nih angin Union Minister of State hi Lairam Isua Krista Baptist Kohhran (LIKBK) Centre Church, Lawngtlai Bazar Veng zing inkhawmah inkhawm hmasain, inkhawm banah Kohhran hruaitute nen inkawm hona hun an hmang a. Union Minister of State chuan India ramah Kristiante chu minority kan nih thu sawiin, ram hmasawnna kawngah erawh Kristiante leh kohhranin a thawh hlawk hle tih a sawi a. Kohhran kal tlanga ram leh khawtlang tana rawngbawlna chu a ngaihhlut thu sawiin, kohhran hruaitute’n sikul leh damdawi in kal tlanga an rawngbawlnaa mamawh an neih a hnena an thlente chu a theih anga tihthlawhtlinsak a tum thu a sawi a ni.

Hemi hnu hian LIKBK enkawl damdawi in, Lairam Christian Medical Centre & Hospital (LCMC&H) chu tlawh nghalin, thawktute nen damdawi in dinhmun leh hmachhawp hrang hrang an sawi ho va. Lawngtlai College Venga PMJVK sum hmanga Residential Sports School sak mek chu a hmunah tlawh bawkin, hna kal mek a enfiah a. Hemi hnu hian KMMTTP kawngpui sial mek chu Lawngtlai-Diltlang-Parva Junction aṭanga AOC Junction thleng zawhin, a en bawk.

Lawngtlaia state sawrkar leh Lai Autonomous District Council (LADC) hnuaia official-te nena Lawngtlai DC Conference Hall-a review meeting buatsaihah Union Minister of State Pu John Barla chuan Sawrkar Laipuiin minority-te hmasawnna tur a ngaih pawimawh thu leh an tana ruahmanna hrang hrang a duan thu sawiin, official kal khawmte chu khua leh tuite’n sawrkar ruahmanna an hriat a, a taka an chhawr theih nana hriattir leh anmahni ṭanpui kawngah theih tawp chhuah turin a chah a ni.

He hunah hian Lawngtlai Bawrhsap Pu Amol Srivastava, IAS chuan Lawngtlai District dinhmun tlangpui leh District chhunga sawrkar hma lakna langsar zualte report a pe a. Union Minister of State ho hian official kal khawmte chuan Sawrkar Laipui ruahmanna hnuaia hma lakna hrang hrangte sawi hovin, harsatna chin fel dan tur leh chak zawka hma lak dan tur te an sawi ho a ni.

Hemi hnu hian Union Minister of State chuan Circuit House-ah chawchhun eiin, Aizawl panin helicopter-in Lawngtlai hi a chhuahsan leh nghal a ni.

Issued by : I&PRO, Lawngtlai