Lawngtlaiah Bawrhsap kal chhuak tur, Pu Amol Srivastava thlahna hun hman a ni
Lawngtlai Bawrhsap kal chhuak tur, Pu Amol Srivastava, IAS pualin vawiin khan Lawngtlai DC Conference Hall-ah Lawngtlaia head of office-te leh Officers’ Club Lawngtlai (OCL) te nen a huhova amah thlahna hun buatsaih a ni.
He hun hi Lawngtlai District Rural Development Office-a Project Director Pi Marilyn Rualzakhumthangi chuan kaihruaiin, hun buatsaih chhan a sawi fiah a. Lawngtlai Bawrhsap chu District-a administration keng kawhtu leh department hrang hrang khai khawmtu a nih angin head of office-te nena thlahna hun buatsaih ṭha tih a nih thu leh, OCL-in an patron a nih anga an thlahna nen kai kawpin thlahna hun chu buatsaih a nih thu a sawi.
Lawngtlai Bawrhsap kal chhuak tur Pu Amol Srivastava hi OCL ai awhin President Er Laldawngliana, Sr EE, P&E chuan ngaihhruina thuziak (memento) a hlan a. State Bank of India, Lawngtlai Branch leh Block Development Officer, Bungtlang ‘S’ te’n ngaihhruina thilpek an hlan bawk a. District Administration ai awhin Additional Deputy Commissioner Pu Abraham Beirazi Khithie, Police ai awhin Additional Superintendent of Police Pu C. Lalruatkima leh OCL ai awhin Outgoing President Er Netralal Jaisi, Sr EE, PHED te bakah, Chief Medical Officer Dr LP Malsawma leh District Medical Superintendent, District Hospital Lawngtlai Dr Beiparysa K. te’n thlahna thu an sawi bawk.
He hunah hian Lawngtlai Bawrhsap kal chhuak tur Pu Amol Srivastava chuan Bawrhsap hna a thawh chhunga Lawngtlai District mipui, pawl hrang hrang, kohhran, District Council leh sawrkar department hrang hrangte thawhpuina leh ṭawiawmnaah lawm thu a sawi a. Lawngtlai District-a a awm chu a hna thawh kawnga hun chhinchhiah tlak leh a hriat reng tur a nih thu sawiin, official kal khawmte chu inpumkhatna ṭha tak nen Lawngtlai District hma sawn nan ṭhahnem ngai taka thawk chhunzawm zel tura chahin, duhsakna a hlan a ni.
Pu Amol Srivastava hian May ni 20, 2022 khan Lawngtlai Bawrhsap hna hi a zawm a. Tunah hian Mizoram sawrkar Disaster Management & Rehabilitation Department-ah Additional Secretary ni turin Lawngtlai District Bawrhsap office hi a chhuahsan dawn a ni.
Vawiina a puala hun bik buatsaih piah lamah hian Mizoram Journalists’ Association (MJA), Lawngtlai District; pawl leh department eng emaw zat chuan mahni pualin a hranpain Bawrhsap kal chhuak tur thlahna hun hi an lo hmang tawh hlawm a ni.
Issued by : I&PRO, Lawngtlai