Lawngtlaiah State Day vawi 37-na lawm a ni

India ram state puitlinga Mizoram hlan kai a nih ni, Mizoram State Day vawi 37-na chu vawiin khan Lawngtlai DC Conference Hall-ah lawm a ni a. Bawrhsap Pu David Lalthantluanga chu Khuallian a ni.

 

Khuallian, Lawngtlai Bawrhsap chuan Lawngtlai District mipuite State Day chibai bukin, state nihna chu harsatna tam tak pal tlanga  hmuh a nih avangin ngaihlu tur leh state dangte tana state entawn tlaka Mizoram din chhuak tura theih tawp chhuah turin a chah a. Ram hruaitu, sawrkar hna thawk, tlawmngai pawl, kohhran, political party, media leh mipuite’n ram hmasawn nan mahni hma zawna tih tur ṭheuh hlen chhuah tum tur leh inpumkhatna leh thawh hona ṭha neih zel tum turin a chah a. District hmasawn nan zirna kawngah ṭan lak deuh deuh a ṭul thu uar taka sawiin, ram tana inpekna thuk zawk nei a, hnam hmangaihna rilru pu tur leh ramin hma a sawn theih nan mahni intodelh tura ṭan la turin District mipuite chu a sawm bawk a ni.

 

Lawngtlaia State Day lawmna hun hi Lawngtlai Additional Deputy Commissioner Pu Abraham Beirazi Khithie chuan kaihruaiin, kum 1986 June ni 30-a MNF leh India sawrkarin Remna Thuthlung an ziah fel hnua kum 1987 February ni 20-a Mizoramin state nihna a neih chhoh dan a sawi a. Presbyterian Church of India (PCI) Lawngtlai Pastor Bial bialtu, Rev. K. Zalawma’n hunserh a hmang a. Nl. Lalhlimpuii’n Mizo Hnam Hla, “Ro Min Relsak Ang Che” tih chu thiam takin a sa bawk.

 

Vawiina Lawngtlaia State Day lawmnaah hian state sawrkar hnuaia official-te, tlawmngai pawl hruaitute leh chanchinbu mite an tel a ni.

 

Issued by : I&PRO, Lawngtlai