Lawngtlaiah Bawrhsapin Akshaya Patra Foundation atanga COVID-19 vanga chhungkaw khawsak harsate tanpuina tur an dawnte Lawngtlai khawpui chhung VLTF-te kutah a hlan

Lawngtlai Bawrhsap Dr Andrew H. Vanlaldika hma laknaa Akshaya Patra Foundation, Bangalore atanga Lawngtlai District-a COVID-19 hri leng vanga inkharkhip tuar chhungkaw khawsak harsate tanpuina ei tur leh ni tin mamawh dil chhuah chuan vawiin khan Lawngtlai a thleng a. He’ng ei tur leh ni tin mamawhte hi Lawngtlai Bawrhsap Dr Andrew H. Vanlaldika chuan Lawngtlai khawpui chhunga village level task force (VLTF)-te kutah an huam chhunga a dawng tur thlan chhuahte hnena an lo hlan chhawn atan a hlan.

 

Lawngtlai Bawrhsap pisa tuala chhawmdawlna inhlanna hun buatsaihah Bawrhsap Dr Andrew H. Vanlaldika chuan Lawngtlai District-a hri leng tuartu chhungkaw tam tak harsatna an thlente ngai pawimawha Akshaya Patra Foundation, Bangalore te an rawn luang chhuak chu lawmawm a tih thu sawiin, an thil tha tih chuan Lawngtlai District chhunga chhungkaw tam tak harsatna a chhawkin, District mipuite paw’n an hre reng tawh dawn a ni, a ti.

 

Additional Deputy Commissioner Pu James Miahlung chuan Akshaya Patra Foundation te nen an indawr dan sawiin, an thil rawn thawnte a tar lang a. Akshaya Patra Foundation te hian ei tur leh ni tin mamawh item hrang hrang sawm pariat khung khawmna ‘happiness kit’ an tih chu bawm 1,914 an rawn thawn a. Happiness kit bawm khat hi chhungkaw pakhat chan tur zel niin, a chhungah hian – chakki atta, buhfai, chhangphut, moong dal, chana, poha, tel, masala, hmarcha dip, aieng, chi, biscuit, hmai tuamna, ha nawhna, ha hlo, sahbawn, sanitary pad leh notebook te khung theuh a ni.

 

He’ng chhawmdawlnate hi Lawngtlai District chhunga RD block pali-ahte incident commander-te kal tlangin chhungkaw thlan chhuahte hnenah sem chhunzawm zel a ni ang.

 

Issued by: I&PRO, Lawngtlai