Lawngtlaiah OCL huaihawt Inter-departmental Sports 2022 ṭan a ni

Officers’ Club Lawngtlai (OCL) huaihawt Lawngtlaia state/central/PSU/bank hnuaia department hrang hrangte intihhlimna, Inter-Departmental Sports 2022 chu nizan khan Rorela Futsal Ground, Lawngtlai Vengpuiah Lawngtlai Bawrhsap Pu Amol Srivastava, IAS chuan a hawng.

Bawrhsap chuan infiamna chu taksa sawi zawina a nih bakah, rilru hrisel nan pawh a pawimawh tel tih sawiin, hripui vanga hun rei tak sports lam hawi a rem tawh loh hnuah boruak zalen tak hnuaia OCL huaihawt inter-departmental sports kalpui a ni leh thei tur chu lawmawm a tih thu a sawi a. Sports chu department hrang hrangte kara inpawhna ṭha leh thawh hona ṭha siamtu a nih a beisei thu sawiin, Sports-a tel zawng zawngte chu hlim taka hun hmang turin duhsakna a hlan a. Futsal ball chhuihin Inter-departmental Sports 2022 chu a hawng nghal a ni.

He Inter-departmental Sports hawnna hi Organising Committee Chairman, OCL Sr Vice President Pu C. Lalruatkima, Additional SP chuan a kaihruai a. Baptist Church of Mizoram (BCM) Lawngtlai East Bialtu Pastor Rev. Lalzarliana Khiangte chuan hunserh hmangin, OCL President Er Netralal Jaisi, Sr EE, PHED chuan inlawmna thu a sawi a. Organising Committee Vice Chairman Dr Charlie C. Chawngthu, Veterinary Officer kaihhruaiin infiamnaa tel tur team tin ai awhte’n thutiam an sawi rual a. Infiamna ṭan nghal a ni.

OCL huaihawt Inter-departmental Sports 2022 hi November ni 25, 2022 (Zirtawpni) thleng neih a ni dawn a. Infiamna chi hrang panga – futsal, badminton, table tennis, carrom board leh chinese checkers hmanga inel tur niin, department/office 50 chuang an tel a. Rualkhai taka intihsiakna kalpui a nih theih nan department hrang hrang inkawpin, team 15-ah inṭhen a ni.

Issued by: I&PRO,Lawngtlai