Lawngtlaiah Special Summary Revision Final Electoral Roll, 2023 tlangzarh a ni

Special Summary Revision, 2023 neih zawh taka Lawngtlai District-a assembly bial pathuma final electoral roll chu vawiin khan Lawngtlai District Election Officer, Lawngtlai Bawrhsap ni bawk Pu Amol Srivastava chuan DC Conference Hall-ah a tlangzarh a. Final electoral roll, 2023 hi political party ai awhte hnenah a hlan nghal.

Lawngtlai DEO chuan a hun taka final electoral roll, 2023 tlangzarh theih a ni chu thawktute inpekna vang a nih thu sawiin, Election Branch, ERO leh AERO te chungah lawm thu a sawi a. Hemi atana thawhpuitu BLO, political party leh tlawmngai pawlte chungah lawm thu a sawi bawk. Inthlan kum a nih avangin electoral roll chu a pawimawh lehzual tih sawiin, voter-te chu electoral roll-a an chuan dan en chik turin a chah a, summary revision piah lamah kum tluanin Election Branch-ah lut thar, insawn, belh leh paih leh siam ṭhat ngaite tih theih reng a nih thu a sawi bawk.

Vawiina tlangzarh tak Lawngtlai District final electoral roll, 2023-ah hian 36-Tuichawng (ST) Assembly Constituency (A/C)-ah vote nei mipa 17,958 leh hmeichhia 17,340, an vaiin mi 35,298 an awm a; draft roll aia a punna hi 1,126 a ni. 37-Lawngtlai West (ST) A/C bialah vote nei mipa 14,421 leh hmeichhia 14,280, an vaiin mi 28,701 an awm a; draft roll aia a punna hi 760 a ni. 38-Lawngtlai East (ST) A/C bialah voter mipa 12,289 leh hmeichhia 13,133, an vaiin mi 25,422 an awm a; draft roll aia a punna hi 535 a ni. Lawngtlai District-ah hian a pumpuiah vote nei mipa 44,668 leh hmeichhia 44,753, an vaiin mi 89,421 an awm a; draft roll aṭangin voter 2,421-in an pung a ni.

Sex ratio anga chhutin 36-Tuichawng bialah voter mipa 1,000 zelah hmeichhia 966 an awm a; 37-Lawngtlai West bialah voter mipa 1,000 zelah hmeichhia 990 awmin, 38-Lawngtlai East bialah voter mipa 1,000 zelah hmeichhia 1,069 an awm thung a. Lawngtlai District pumah voter mipa 1,000 zelah hmeichhia 1,002 an awm a ni.

36-Tuichawng biala polling station 70 awmah, voter 1,042 awmna 36/34-Ugudasury South P/S chu voter tamna ber niin, voter 132 awmna 36/51-Charluitlang P/S chu voter tlemna ber a ni a. 37-Lawngtlai West biala polling station 69 awmah, voter 1,027 awmna 37/15-AOC Veng P/S chu voter tamna ber niin, voter 61 awmna 37/34-Hlimzawl P/S chu voter tlemna ber a ni a. 38-Lawngtlai East biala polling station 42 awmah, voter 1,072 awmna 38/18-Pangkhua P/S chu voter tamna ber niin, voter 117 awmna 38/11-Council Veng East-II P/S chu voter tlemna ber a ni thung.

Lawngtlai District final electoral roll, 2023 hi mahni bialtu Booth Level Officer (BLO) te hnenah emaw, Electoral Registration Officer (ERO) te hnenah emaw, DC office Election Branch-ah emaw, online-in NVSP Portal, nvsp.inemaw, electoralsearch.in emawah te a duh tan en theih a ni.

Issued by: I&PRO, Lawngtlai