Lawngtlaiah World Water Day 2023 hman a ni
Vawiin kha khawvel pum huapa tui ngaihhlut inzirtir ni, “World Water Day 2023” a ni a. Lawngtlaiah chuan Public Health Engineering Department (PHED), Lawngtlai WATSAN Division buatsaihin Lawngtlai PHED Office Complex-ah hman niin, Lawngtlai Bawrhsap, District Water & Sanitation Committee Chairman Pu David Lalthantluanga chu Khuallian a ni.
Pu David Lalthantluanga chuan khawvel thang chho mekah tui harsatna tikiang tura danglamna thlen turin mimal tin leh sawrkar thawh hona a pawimawh thu sawiin, United Nations pawhin khawvel pum huapa tui leh thianghlimna kawnga hmasawnna chu a ngaih pawimawh thu a sawi a. Khawvel hmasawnna kal mekah bawlhhlawh leh hnawm paih kawngah mipuite fimkhur tura chahin, kan bawlhhlawh paih dan leh paihna hmun hian tuihna leh tui thianghlim kan neihna kawngah kawngro thui tak a su a ni, a ti a. Kumin World Water Day puala hmalakna, “Danglamna ka ni thei” tih chu mimal tinte a taka thlentirtu nih tum tura chahin, faina leh thianghlimna kawnga khawtlangin hma a sawnna tur chu sawrkar kuta dah mai lova mahni ngeiin bul tan chu thil pawimawh hmasa ber a ni, a ti a. Kumin World Water Day thupui, “tui leh thianghlimna kawnga chak zawka a tha lama danglamna thlen” tih chu a taka tipuitlingtu nih tum theuh turin kal khawmte chu a chah a ni.
Lawngtlaia World Water Day puala hun hman hi PHED Lawngtlai WATSAN Division-a Sr Executive Engineer Er Netralal Jaisi chuan kaihruaiin, kal khawmte lawmna thu leh World Water Day hman chhoh a nih dan a sawi a. Tui chungchangah mipuite tan rualna a pawimawh thu sawiin, tui humhalh kawngah mipa leh hmeichhe tih tur bik a awm loh thu a sawi a. Tuihna kiam zel leh kang chat mek veng turin tuihna humhalh leh khuahkhirh kawngah dan tha zawk duan a tul thu a sawi bawk a. PHED-a Sub-Divisional Officer Er L. Sangromuana chuan lawm thu sawiin hun a khar a ni.
Vawiin hun hmanah hian sawrkar official-te, khawtlang hruaitute leh tlawmngai pawl hrang hrang ai awhte leh thu thar theh darhtute an tel a ni.
Hun hman zawh hian Khuallianin World Water Day puala kawng zawh (rally) kalpui turte chu PHED office tual atangin a vai liam nghal a. PHED office kawt atangin Lawngtlai Bazar Venga Areopagy thlengin kawng zawh a ni a. Rally-a telte hian thuziak – banner leh pamphlet te kengin, tuihna humhalh leh tui renchem kawnga hma lak tulzia tlangaupuiin an au rual a ni.
World Water Day hi United Nations (UN) bul tumin kum 1993 atang khan khawvel pumah kum tin March ni 22-ah hman thin a ni a. Tui pawimawhna leh hlutna te, humhalh leh renchem a tulzia te au chhuahpuina leh inzirtirna ni atan hman thin a ni a. Kum tin thupui thlan bik awmin, kumin 2023 hian thupui atan, “Accelerating Change : to Solve the Water and Sanitation Crisis” tih hman a ni.