Lawngtlai District hi Mizoram chhim tawp lama awm a ni a. September ni 18, 1998 khan district-ah puan a ni a. A hma chuan Chhimtuipui District hnuaia awm a ni. A district khawthlang lam hi India rama hnam tenau zawkte (minority) awm khawm tamna leh bitna ber hmun pakhat a ni. Lawngtlai District hi Lunglei District leh Siaha District-in hmun hnihah a then hrang a. A chhak lam hi Mizorama lui lian ber, Chhimtuipui chhak lamah awmin, Sangau Sub-Division huam chin a ni a. Thlang lamah hian Lawngtlai Sub-Division (Sadar) leh Chawngte Sub-Division te a awm bawk. Deputy Commissioner (DC) hnuaiah district inrelbawlna hi awmin, a puibawm turin Additional Deputy Commissioner (ADC) pakhat, Sub-Divisional Officer (SDO) pathum leh Sub-Deputy Commissioner (SDC) pali an awm bawk a ni. SDO-te hian Sangau, Chawngte leh Lawngtlai (Sadar) Sub-Division te an enkawl a ni.
He District chhunga hmun pawimawh leh chhinchhiah tlak langsar zualte chu – Mizorama tlang sang ber Phawngpui tlang te, Phawngpui National Park leh Ngengpui Wildlife Sanctuary te a ni a. Phawngpui tlang hi tuipui zawl atanga metre 2,157-a sang niin, khualzinte’n an tlawh tam ber pakhat a ni a, Lawngtlai khawpui atanga khawchhak lam kilometre 165 vela hlaah a awm. Phawngpui tlang leh a chhehvel ramngaw humhalh chin kilometre sawmnga bial (50 sq. kms) bawr vel chu national park-a puan a ni a. He Phawngpui National Park-ah hian sava chi hrang hrang hmuh tur awmin, sava vang tak tak – Mizoram state bird vavu (Mrs Hume’s pheasant), vanga (Blyth’s tragopan) leh mupui (falcon) te chu a hriat hlawh zual an ni a. Ramsa vang tawh tak tak – Mizoram state animal saza (serow), sathar (mountain goat), sahuai (slow loris), savawm (Asiatic black bear) leh sa dang tam tak a awm bawk. A tlang pang awihtlan zawng zawng hi nauban (orchid) leh chhawkhlei (rhododendron)-in a bawh vul chuk mai a. A tlang bulthuta khaw awm, Sentetfiang khuaah chuan kum 2018 Vau thla (March) khan Mizorama ‘Chhawkhlei Kut’ hman hmasak ber chu buatsaih a ni nghe nghe. Ngengpui Wildlife Sanctuary pawh hi kilometre 110 bial (110 sq. kms) laia zau, ramngaw chhah tha tak, kum tluana hring reng mai, thing leh mau leh ramsa leh sava chi hrang hrang awmna a ni a. Lawngtlai khawpui atanga khawthlang lam kilometre 40 vela hlaa awm a ni.
Lawngtlai hi Mizoram district-te zinga ei leh bar zawn kawnga district hnufual ber pawl a ni a; a mi cheng za zela sawmruk (60%) lai chu lo neia ei zawng niin, za zela 37.9 (37.9%) chu sawrkar hna thawk leh za zela 2.4 (2.4%) chu sumdawnna hmanga ei zawng an ni. Chhungkaw awm zawng zawng atangin za zela 37.54 (37.54%) chu below poverty line (BPL) chhungkua an ni a. Ziak leh chhiar thiam pawh za zelah 66.41 (66.41%) chauh awmin, Mizoram district pariat zinga ziak leh chhiar thiam tlemna ber district a ni. Zirna lam hi elementary stage chin chu Lai Autonomous District Council (LADC)-in enkawlin, hmun danga subject hrang hrang an zir ang bakah, zirlaite’n Lai tawng an thiam theih nan Laica (Lai tawng) chu middle sikul (pawl riat chin) thleng zirtir tel a ni.