ADB Vice Chairman Pu H. Biakzaua’n Lawngtlai Electric Venga Community Health Clinic Centre a hawng

Lawngtlai East bialtu MLA, Agriculture Development Board Vice Chairman Pu H. Biakzaua chuan tukin zingkar khan Lawngtlai Electric Venga Community Health Clinic Centre sak thar a hawng a, District TB Centre, Lawngtlai tana X-Ray khawl bunna tur hmun a en bawk.

 

MLA Local Area Development Fund ₹ nuai 4 senga sak Lawngtlai Electric Venga Community Health Clinic Centre building thar leh Centre thar hawnnaah Pu H. Biakzaua chuan Chief Minister leh Health Minister te’n hriselna ngai pawimawhin, hriselna kawnga district hnufual Lawngtlai District-ah health sector lam tihchangtlun a nih theih nan theih tawp chhuah lin hma an la tih a sawi a. Lawngtlai East bialah Community Health Clinic Centre 11 hawn remtih a nih hnuah, building awm sa hmun thum tih loh, hmun riatah MLA Fund hmangin building sak a ni tiin, Sawrkar chuan tun hnai lawk khan Lawngtlai-III leh Lungtian-II-ah Centre dah a remtih leh thu a sawi a. Lawngtlai West bial lamah pawh hma lakna kalpui mek a ni, a ti.

 

Pu H. Biakzaua chuan Centre hawn tawhahte MLA Fund hmangin thawktu rawih a nih thu sawiin, tun hnai khan Sawrkar chuan Centre-a thawktute hlawh tumsak a remti tawh tih thu a sawi bawk.

 

Health Clinic Centre thar hawnna inkhawm hi Lawngtlai Chief Medical Officer Dr LP Malsawma chuan a kaihruai a. Vawiina hawn tak Community Health Clinic Centre building hi MLA Fund aṭanga Electric Veng Village Council te’n an sak a ni.

 

Lawngtlai East bialtu MLA hian District TB Centre Lawngtlai tan X-Ray dahna tur saksak a tum a. Tukin zingkar vek khan Health Department hotute nen a sakna tur hmunhma an en ho nghal a. Tuna District Hospital Lawngtlaia TB Centre building bul chiahah X-Ray dahna tur hi sak ni se, tiin an ruahman a ni.

 

Issued by : I&PRO, Lawngtlai