LADC leh CADC-a VC by-election atan inbuatsaihna kalpui zel a ni

Lai Autonomous District Council (LADC)-a village council pali leh Chakma Autonomous District Council (CADC)-a village council paruka by-election neih hun atan State Election Commission chuan December ni 16, 2021 a ruat fel a. He VC by-election atan hian inbuatsaihna pawh kalpui chhoh zel a ni.

 

LADC hnuaia Mualbu L, Darnamtlang, Lungpher South leh Vawmbuk-II VC-ahte general seat pakhat theuh hnawh khah tur awmin, CADC hnuaia New Jognasury-I leh Sumuksora VC-ahte general seat pakhat ve ve, Ajasora-II leh Parva-IV VC-ahte general seat panga ve ve leh reserved seat pakhat ve ve, Borapansury-II VC-ah general seat paruk leh reserved seat pakhat, Kamalanagar-V VC-ah general seat pahnih leh reserved seat pakhat hnawh khah tur a awm bawk a. He’ng VC-a hmun ruak hnawh khah tura chuh tumte tan tun thla, November ni 29 thleng hming pek luhna hun hawn a ni a, thla thar December ni 16-ah vote thlak niin, vote tlate hi chhiar nghal a ni dawn a, inthlan hi a pumpuiin December ni 20-ah zawh fel tura ruahman a ni.

 

By-election buatsaih tur hian Lawngtlai District Election Office chuan tul pawimawhte a bawhzui mek a. Thawhtanni khan Returning Officer tura ruatte koh khawm a, training neihpui an ni a. Inthlannaa Returning Officer turte hian nimin atang khan an duty-na tur hmun an thutchilh nghal a ni.

 

Issued by: I&PRO, Lawngtlai