Lawngtlaiah Bawrhsapin One Stop Centre building thar a hawng

Vawiin khan Ministry of Women and Child Development hnuaia din, Lawngtlai District-a hmeichhe baihvaite tluk luh lailawkna tur ‘Sakhi – One Stop Centre’ building thar, Lawngtlai College Venga mi chu Lawngtlai Bawrhsap Pu David Lalthantluanga chuan a hawng.

 

Pu David Lalthantluanga chuan OSC chu hmeichhiate himna tura hma lakna lawmawm tak nia a hriat thu sawiin, a thawktute pawh missionary rilru pu a, hmeichhiate chunga hleilenna thleng hrang hrang laka hma laksak a, chuti ang thleng ṭhin dodalna kawnga theih tawp chhuah turin a chah a ni.

 

OSC building thar hawnna hun hi Lawngtlai CDPO Pu Zothanmawia Hnamte chuan kaihruaiin, kal khawmte lawmna thu a sawi a. OSC-a District Centre Administrator Pi J. Lalremkimi’n thawktute inhmelhriattirna hun hmangin, OSC chanchin tlangpui leh he building sak ṭan a nih dan te a sawi a. DPO office-a District Mission Co-ordinator Pi F. Lalengvari’n lawm thu sawina hun a hman zawhah, Khuallianin cake zaiin hun a khar a ni.

 

He hunah hian Sawrkar department hrang hrang official-te, tlawmngai pawl hrang hrang ai awhte leh Lawngtlai District chhunga Women & Child Development hnuaia Office hrang hranga thawktute an tel a ni.

 

One Stop Centre hi inchhungkhura hleilenna chi hrang hrang tuar hmeichhiate’n vanduaina emaw, an sut kian zawh loh harsatna emaw an tawha an tluk luhna leh inhumhim lailawkna tura din a ni a. Rikrum thila ṭanpuina pek te, an hliam enkawlsak te, dan hnuaia an dikna chanvo an hmuh theih nana ṭanpui te, an rilru hahdamna tura counselling pek te, riahna tur leh ei tur lo buatsaihsak te an ti ṭhin a. Chu’ng kawng hrang hranga ṭanpui tur chuan thawktu mi 12 an awm mek a. Security Guard te’n awm chilhin, OSC pantute chu venhimna leh inenkawlna ṭha tak pek ṭhin an ni.

 

Issued by : I & PRO, Lawngtlai