Lawngtlaiah COVID-19 vanga inkhuahkhirhna kalpui mek thlir hovin DLTF an thu khawm
Vawiin khan Lawngtlai District Level Task Force on COVID-19 (DLTF) chu Lawngtlai Bawrhsap Dr Andrew H. Vanlaldika hovin Lawngtlai DC Conference Hall-ah an thu khawm a. COVID-19 hri leng laka him nana state sawrkar ruahmanna zulzuia Lawngtlai District chhunga ni 31.01.2022 thleng awh tur inkhuahkhirhna kalpui mek an thlir ho.
Dr Andrew H. Vanlaldika chuan hri leng dona kawngah inthlahdah a la thiang lo va, theih tawpa tan lak zui zel a tul tih sawiin, hri dona kawnga thawktu zawng zawng chu thahnem ngai taka thawk zel turin a chah a. District mipuite pawh fimkhurna dan hrang hrangte tha taka zawm a, hri danna la theite’n kim taka lak tum turin a chah bawk.
Lawngtlai District Chief Medical Officer Dr LP Malsawma chuan Lawngtlai District chhunga COVID-19 hri kai dinhmun leh hri danna pek dan a sawi a. Tun dinhmunah Lawngtlai District chhungah kum 18 chin chung lam mi 70,298 chuan first dose la tawhin, vaccine la thei tura ngaih mi 82,359 atanga chhutin 85.30% a ni a. Vaccine lak hmabak hi mi 12,061 an la awm a ni. Second dose la tawh hi mi 39,710 awm thungin, 56.40% an ni a. Precaution dose la tawh mi 162 an awm bawk.
January ni 7, 2022 atang khan kum 15 atanga 17 inkarte COVID-19 hri danna pek tan a ni a. Lawngtlai District-a kum 15 – 17 inkar hri danna la thei tura ngaih mi 9,630 atangin mi 1,757 te’n first dose la tawhin, hri danna la tawh hi 18.20% an ni.
Vawiin meeting-ah hian Lawngtlai District chhunga inkhuahkhirhna kalpui mek chu thlir ho niin, kal zep dan tur sawi ho a ni a. Hri leng laka him nana hma lak zui zel dan tur sawi ho a ni bawk.
He hunah hian state sawrkar thupek angin COVID-19 hri kai an pun nasat leh palh thulha hman theih tur Lawngtlai District-ah makeshift hospital tur pakua ruahman tawh a nih thu tar lan a ni a. Lawngtlai District chhunga COVID-19 vanga nunna chan mi 19 chhungte hnenah ex gratia Rs 50,000/- theuh pek tawh a nih thu tar lan a ni bawk.
Lawngtlai District mipuite’n COVID-19 hri leng laka him nana fimkhurna turte leh sawrkar thupek tha taka an zawm zel theih nan January ni 17 atanga January ni 23, 2022 thlengin Covid Appropriate Behaviour No Tolerance Week hman tum a ni a. Hemi chhung hian dan bawhchhia an awm chuan inngaihhnathiamna awm lovin dan anga hremna lekkawh zel a ni dawn a ni.
Issued by: I&PRO, Lawngtlai