Lawngtlaiah DCC, DLRC leh DLSC an thu khawm

Vawiin khân Lawngtlai District Consultative Committee (DCC), District Level Review Committee (DLRC) leh District Level Security Committee (DLSC) chu an Chairman, Lawngtlai Bawrhsap charge la mêktu Pi Marilyn Rualzakhumthangi hovin DC Conference Hall-ah an ṭhu khâwm.

He ṭhut khâwmah hian Lead Bank Office-a Lead District Manager (Siaha & Lawngtlai) Pu Lallawmkima leh NABARD Lungleia District Development Manager Pu Evan T. Munsong te bâkah, Reserve Bank of India, bank hrang hrang leh line department ai awhte an tel a ni.

Pi Marilyn Rualzakhumthangi chuan Lawngtlai District hmasâwn nâna bank leh line department te hna thawh chu lâwmawm a tih thu sawiin, District mipui, kut hna thawktu leh sumdâwnna bul thar ṭan tûrte dâwm kân nâna sum pûktîr chungchângah ṭha lehzual zâwka hma lâk tum tûrin bank hrang hranga thawktute chu a chah a ni.

He hunah hian kum 2021 January thla aṭanga December thla (4th Quarter 2020-21; 1st, 2nd & 3rd Quarters 2021-22) chhûnga Lawngtlai District-a bank hrang hrangte hna thawh thlîr lêt niin, hmachhawp an neih leh hma lâk zui dân tûr te sawi ho a ni a. Bank leh mipui sum vawn himna (security) lam te, pawisa lêng vêl (currency management & remittance) chungchâng te, khua leh tuite hamṭhat nâna sawrkar laipui ruahmanna hrang hrang – PMAY (Housing for All), Women Self Help Group, loan chi hrang hrang – Kisan Credit Card (AHDF special campaign), PMEGP, etc. leh social security scheme hrang hrang – PMJJBY, PMSBY, APY, etc. lama bank hma lâk dân te sawi ho a ni bawk.

He ṭhut khâwmah hian pawisa thîr hman a harsat chungchâng leh dâwrkaite’n an dawn duh loh ṭhin chungchânga harsatna awm sut kian dân tûr sawi ho a ni a. Pawisa thîr chu sawrkarin hman theih tûra a siam chhuah a nih avângin dawn leh hman a hlauhawm loh thu leh, dawng duh lo chu dân anga hrem theih an nih zâwk thu târ lan a ni a. Bank lamin pawisa thîr an dawng duh lo ṭhîn nia sawi chu thil hriat chian loh vâng a ni a, ṭum khata dawn theih zât bithiah awmin, chumi ang chuan an dawn reng thu bank lam hotute chuan an sawi.

Pawisa hi lehkha aia thîra siam a hautak loh zâwk avângin thîr her chhuah a tam deuh deuh thu te, pawisa thîr chu pawisa lêng vêl atâna ruahman a nih thu te, pawisa thîr hman loh chuan dâwr thil leh chawhmeh man bulṭhut (base price) a tihsân dân leh pawisa nawi awm loh chhuanlama pawisa nawi aia thil zawrh dang inkîr mai a tihhluar dân te, chumiin ṭûl lova mipui sum hman ral a tihpun thu te târ lan niin, he’ng harsatna hrang hrang hi sut kian a nih theih nân Lawngtlai District mipuite, dâwrkaite leh bank-te chu pawisa thîr dawn leh hman kawngah tîm lo tûr leh hnar lo tûrin Committee chuan a ngên a ni.

Pawisa thîr hi bank-ah dah luh theih reng a ni a. Amaherawhchu, bank lamin inkaihhruaina leh kalphung an neih zûlzuiin ₹ 100 bi kim zêl lo chu an dawng thei lo thung a. Hei hi bank dâwr tûrte tân hriat lâwk a, hemi mil hian inher rem ve a ṭûl dâwn a ni. ₹ 1 thîr chu ₹ 100 tling tûrin 100 tal, ₹ 2 thîr chu 50 tal, ₹ 5 thîr chu 20 tal, ₹ 10 thîr chu 10 tal leh ₹ 20 thîr chu 5 tal a tlin a ngai a. Pawisa thîr hi a bi kim zêla neih a ngaih bâkah hian, (₹ 1 leh ₹ 2 inpawlh tih anga) thlan pawlh theih a ni lo bawk a ni.

He ṭhut khâwmah hian mi harsa zâwkte leh kut hna thawktute hnêna a tam thei ang ber sum pûktîr (loan pêk) a, chumi hmanga an dinhmun chawi kân chu DCC-in a tum ber a nih thu târ lan niin, agriculture kaihhnawih loan pêk chhuah a tam zâwk theih nân line department leh bank lam te’n ṭan la chho zêl se, tih a ni.

He hunah hian National Bank for Agriculture and Rural Development (NABARD) Mizoram Regional Office, Aizawl-in a buatsaih Lawngtlai District chhûnga kum 2022-23 chhûnga agriculture kaihhnawih leh bank behchhana hma lâk theihna tûr ruahmanna, ‘Potential Linked Credit Plan 2022-23’ chu Chairman/Lawngtlai Bawrhsap chuan a tlângzarh nghâl a ni.

Issued by: I&PRO, Lawngtlai