Lawngtlaiah District Level SEDP Committee an ṭhu khawm

Tarchhuah NI : 11/04/2023

Vawiin khan Lawngtlai District Level Socio-Economic Development Policy (SEDP) Committee chu Additional Deputy Commissioner Pu Abraham Beirazi Khithie hovin Lawngtlai DC Conference Hall-ah Family Oriented SEDP Phase 2 kalpui dan tur chungchang ngaihtuahin an ṭhu khawm.

Chairman Pu Abraham Beirazi Khithie chuan member kal khawmte lawmna thu sawiin, Lawngtlai District chhunga hlawhtling taka SEDP kalpui a nih theih nan uluk taka ngaihtuahna seng turin member-te chu a sawm a. SEDP line department-te chu an hnuaia beneficiary-te theih tawp chhuahpui tura chahin, beneficiary-te kaihhruai leh vil zui kawngah ṭhahnem ngaih chhuah lehzual turin a chah a ni.

He hunah hian District Level SEDP Committee member, ni 18.02.2023-a boral, Pu Nc. Nguntlunga sun nan minit khat chhung ngawi renga din a ni a. Hemi hnu hian Member Secretary Pi Marilyn Rualzakhumthangi, Project Director DRDO chuan Lawngtlai District chhunga SEDP Phase 1 dinhmun report pein, March 27, 2023-a SEDP Executive Board ṭhut khawm thu chhuak tlangpui a tar lang a. SEDP Executive Board-in ruahmanna a siam sa zul zuia hma lak dan tur hrang hrang sawi ho niin, Family Oriented SEDP Phase 2 kalpui dan tura hunbi ruahman te, Phase 1 hnuaia hma lak chhunzawm dan tur leh Phase 1-a beneficiary ti ṭha lawmman (incentive) pek tur atana endikna kalpui dan tur te, village level SEDP committee aṭanga thu lut ṭhenkhatte chu he ṭhut khawmah hian sawi ho a ni.

Family Oriented SEDP Phase 1-ah hian Mizoram pumah beneficiary 60,000 awmin, benefiary tin hnenah ₹ 50,000/- ṭheuh pek tura ruahman a ni a. Lawngtlai District chhungah department hrang hrang pariat – Agriculture; AH & Vety; Commerce & Industries; Fisheries; Horticulture; Land Resources, Soil & Water Conservation; Sericulture leh Urban Development & Poverty Alleviation department-te hnuaiah SEDP beneficiary 4,500 an awm a. He’ng department hrang hrang hnuaia trade hrang hranga beneficiary-te hnenah hian SEDP ṭanpuina 1st instalment ₹ 25,000/- chu pek fel vek tawh a ni a; 2nd instalment ₹ 25,000/- pawh pek chhuah leh mek niin, beneficiary tam zawkin an dawng leh tawh a ni.

Ruahman dan chuan Family Oriented SEDP Phase 2-ah hian beneficiary 60,000 dang thlan an ni leh dawn a. Ṭanpuina sum ₹ 50,000/- dawn tura ruahman chu instalment hnih bawkin pek chhuah tum a ni a. Vawiin ṭhut khawmah hian SEDP Phase 2 atana hunbi ruahman sa zulzuia Lawngtlai District chhunga kalpui dan tur sawi ho niin, village level SEDP Committee te’n District Level Committee-a Phase 2 beneficiary list an theh luh theih hun tawp bera ruahman ni 30.04.2023 a nih laiin, CADC area bik tan CADC inthlan a awm dawn avangin hunbi tiam chu thla khat zela pawh seisak ni se, tih a ni a. Phase 2 ṭanpuina sum hi August ni 30 ral hmain 2nd instalment nen pe tlak hman vek tura ruahman a ni.

Issued by : I&PRO, Lawngtlai