Lawngtlaiah DTFI an thu khawm
Tarchhuah NI : 25/11/2021
Lawngtlai District chhunga COVID-19 hri danna (vaccine) pek dan leh pek chhunzawm dan tur ngaihtuahin Thawhtanni khan Lawngtlai District Task Force Immunisation (DTFI) chu an Chairman, Lawngtlai Bawrhsap Dr Andrew H. Vanlaldika hovin a office chamber-ah an thu khawm.
District Immunisation Officer Dr S. Thaizi chuan hri danna pek chhoh mek dan report a pe a. Khua tui hul tan leh inkal pawhna ziaawm chho zelah, hmun eng emaw zatah harsatna la awm mah se, Lawngtlai District chhunga COVID-19 hri danna pek chu ngawrh taka kalpui chhoh mek a nih thu leh hmasawnna hmuh tur a awm chhoh zel thu tar lan a ni a. Tun dinhmunah Lawngtlai District chhunga vaccine la thei tura ngaih mi 82,359 zingah mi 63,116 chuan first dose la tawhin, second dose la tawh mi 31,615 an awm bawk.
He meeting-ah hian UNICEF atanga Lawngtlai District dinhmun a hmuna zir chiang tura tirh mi pathum – Dr Arjam Rebecca Aharma, Behaviour Communication Change Consultant; Dr Shubhangi Pandagre, State Public Health Immunisation Consultant leh Jammejaya Meher, State Consultant & Rural Immunisation te bakah, Assam Rifles hotu Major Rajnikant te pawh an tel a. Hri danna pek chhunzawmna tura rawtna awm hrang hrangte sawi ho a ni bawk.
Issued by: I&PRO, Lawngtlai