Lawngtlaiah food safety chungchang zir hona hun buatsaih a ni

Vawiin khan Lawngtlai DC Conference Hall-ah Lawngtlaia ei leh in siam leh zuartute tan ei leh in thianghlim leh himna chungchang zir hona, “Sensitisation Workshop on Food Safety” buatsaih a ni.

 

He huna Khuallian, Lai Autonomous District Council (LADC)-a Sanitation changtu Executive Member (EM) Pu Lalropuia Chinzah chuan ṭha taka hna thawk turin hrisel a pawimawh a, chumi tur chuan mihringin ei in thianghlim leh hrisel kan mamawh tih a sawi a. Ei in thianghlim lo leh hrisel lo chu natna leh thihna hial thlentu a nih avangin ei in siamtu, zuartu leh leitute kan fimkhur a ṭul a ni, a ti. Ei in siamtu kal khawmte chu anmahni dawrtute ei tur hrisel leh thianghlim hlui chu an mawhphurhna a ni tih hre reng tura chahin, “kan him tlan nan leh kan lo hrisel deuh deuh theih nan Food Safety and Standards Act, 2006 hnuaia dante hi mi tinin ṭha takin i zawm ang u,” tiin kal khawmte chu a sawm a ni.

 

He zir hona hi Lawngtlai Chief Medical Officer Dr LP Malsawma, Designated Officer (Food Safety) chuan a kaihruai a. Lawngtlai Additional Deputy Commissioner Pu James Miahlung, Adjucating Officer (Food Safety) chuan food safety chungchanga Lawngtlai District chhunga hma lakna report a pe a. CMO office Lawngtlaia Assistant Drug Inspector Pu P. Laltlanzova’n food safety chungchang leh Food Safety and Standards Acts & Rules-a hriat tur pawimawhte leh ei in siamtute tana hriat tur pawimawh hrang hrang a zirtir a. Zawhna leh chhanna leh sawi hona hun hman zui niin, Lawngtlai Sub-Divisional Officer (Sadar) Pi TT Beikhaizi chuan lawm thu sawiin hun a khar a ni.

 

Food Safety and Standards Act, 2006 hi India ramah mihring tana ei leh in tur ṭha, natna hrik laka him leh chakna pai siam chhuah leh mipui hnena pek a nih theih nana dan siam niin, August ni 5, 2011 aṭanga hman ṭan a ni a. He dan hnuaiah hian ei tur siamna, vawn ṭhatna leh zawrhna hmun chhinchhiah (registration & licence) te, ei tur siam chhuah leh zawrhte a ṭhat leh ṭhat loh enfiah te kalpui ṭhin a ni.

 

India rama ei leh in siam chhuaktu, chaw luttu leh chhawp chhuaktu zawng zawng (a siamna hmunpui, restaurant, thingpui dawr, chhang siam, catering, nepnawi zuar, dawr, ran talh, adt.) chuan Food Safety and Standards Authority of India (FSSAI) aṭangin phalna (registration/licence) an nei hmasa vek tur a ni a. Dan bawhchhia (registration/licence nei lova ei leh in zuar emaw, ei tur thianghlim lo leh him tawk lo zuar emaw) an awm chuan man a, hrem leh an thil siam tihchhiat theih a ni.

 

Registration hi ṭum khatah kum khat aṭanga kum nga chhung atan tih theih a ni a. Registration fee hi (kum khata ₹ nuai 12 man hu hmu tling lo tan) kum khatah ₹ 100/- zel a ni a. Sumdawnna lian deuh, kum khata ₹ nuai 12 man hu hmu tling chin tan chuan licence neih a ngai a, licence fee hi kum khatah ₹ 2,000/- zel a ni thung.

 

Lawngtlai District chhunga ei leh in zuar (Food Business Operator) ziah luh leh chhinchhiahna hi kumin atan kalpui tawh niin, tunah hian inziak lut 93 an awm mek a. Food Safety kenkawh chungchangah Inspection Team din niin, anni hian ei siamna hmun leh zawrhna hmun te an endik ṭhin a ni.

 

Issued by: I&PRO, Lawngtlai