Lawngtlaiah Green Mizoram Day 2022 hman dan tur rel a ni

Vawiin khan Lawngtlai District Level Committee on Green Mizoram Day chu an Chairman, Lawngtlai Bawrhsap Pu Amol Srivastava hovin Lawngtlai DC Conference Hall-ah an ṭhu khawm a. June ni 10, 2022 (Zirtawpni)-a Lawngtlaia Green Mizoram Day hman dan tur an sawi ho.

 

He hunah hian Lai Autonomous District Council hnuaia Environment, Forests & Climate Change Department-a Assistant Conservator of Forests Pu Albert Lalrinzuala chuan kum hmasa lama Green Mizoram Day hman tawh dan leh kumina Green Mizoram Day atana department-in inbuatsaihna a kalpui tawh chin report a pe a. Member kal khawmte chuan kumina Green Mizoram Day hawnna programme duangin, thing phunna hmun tur leh phun tur zat te, a phun dan tur te an sawi ho zui a ni.

 

Green Mizoram Day hi kum tin June ni 11-ah hman ṭhin niin, kumin hian Inrinni a nih dawn avangin State Level Sub-Committee chuan June ni 10-ah hman ni se, tiin a rel a. Lawngtlai District-ah chuan June ni 10 hian Bawrhsap Pisa tualah chawhma dar 10:00-ah Bawrhsap Pu Amol Srivastava kaihhruaiin a hawnna hun hman tum niin, LADC Chief Executive Member Pu V. Zirsanga chu Khuallian atan beisei a ni a. He hunah hian kangmei veng ṭha khua chawimawina, “village level fire prevention award” pawh sem leh tura ruahman a ni.

 

Bawrhsap pisa tuala a hawnna hun hman zawhah Green Mizoram Day 2022-a thing phunna hmun atana ruahman KMMTTP Road kawngpui sir, Rualkhuma Quarry aṭanga chhim lamah department hrang hrangte chuan an puala thing phunna hmun tur ruahman saah thing an phun ang a. Thing phun tur leh a hungna tur hi LADC EF&CC Department te’n a hmunah an lo chhawp lawk dawn a. Kumin hian thing ṭiak 350 vel phun theih beisei a ni.

 

Issued by : I&PRO, Lawngtlai