Lawngtlaiah hri danna pek chungchangah DTFI an ṭhu khawm

Vawiin khan Lawngtlai District Task Force Immunisation (DTFI) chu an Chairman, Lawngtlai Bawrhsap Pu Amol Srivastava hovin DC Conference Hall-ah an ṭhu khawm a. Lawngtlai District-a hri danna (routine immunisation) pek chungchang an sawi ho.

 

Chairman Pu Amol Srivastava chuan kal khawmte lawmna thu sawiin, Lawngtlai District-in hriselna lama hma a sawn zel theih nan thawktute chu ṭhahnem ngai tak leh kawngkal nei taka ruahmanna siama thawk turin a fuih thar a. DTFI Member Secretary, District Immunisation Officer Dr S. Thaizi hnen aṭangin routine immunisation (RI) leh special RI kalpui dan report ngaihthlak niin, World Health Organisation (WHO) hnuaia Surveillance Medical Officer Dr Lalhlimpuii chuan routine immunisation-a Lawngtlai District dinhmun leh hma lakna tur te PowerPoint presentation hmangin a tar lang bawk a. Hri danna pek chungchanga harsatna awmte leh ṭha zawk leh felfai zawka kalpui a nih theih nana rawtna hrang hrangte leh kum thar atana hma lakna tur hmachhawpte sawi ho zui nghal a ni.

 

Chief Medical Officer ruahmannain Lawngtlai District chhunga fur laia kal pawh harsa zual khuaahte kum 2022 October aṭanga December thla chhung khan hri danna pek beihpui thlak (special RI) kalpui a ni a. Borapansury, Jarulsury, Sumsilui, Parva, Damdep, Devasora, Mautlang leh Vaṭhuampui Sub-Centre te’n an huam khaw hrang hrangah hri danna pek beihpui hi thlak niin, nu naupai, nausen leh naupang hnenah vaccine chi hrang hrang Tetanus-Diphtheria, Penta leh Measles-Rubella vaccine te pek a ni a. Kumin fur ruahtui tlak hmain special RI hi kalpui chhunzawm tum a ni bawk.

 

He ṭhut khawmah hian hriselna lama Lawngtlai District hmasawn dan chiang zawka hriat theih nan hri danna pek chungchanga thil chhinchhiah dan (record) felfai zawk ruahman a, report pek pawh uluk lehzuala kalpui ni se, tih a ni a. Hri danna lak chungchanga mipui zirtirna a tam thei ang ber leh zau thei ang bera puanzar ni se, tih a ni bawk.

 

Issued by: I&PRO, Lawngtlai