Lawngtlaiah hri danna pek chungchangah DTFI an thu khawm

Vawiin khan Lawngtlai District Task Force Immunisation (DTFI) chu an Chairman, Lawngtlai Bawrhsap Pu Amol Srivastava hovin DC Conference Hall-ah an ṭhu khawm a. Lawngtlai District-a COVID-19 hri danna (vaccine) leh hri danna dang (routine immunisation) pek chungchang an sawi ho.

 

He ṭhut khawmah hian district administration, health department leh ICDS official-te leh Lawngtlaia sikul hrang hrang Principal leh Headmaster te leh tlawmngai pawl ai awhte an tel a. Member Secretary, District Immunisation Officer Dr S. Thaizi hnen aṭangin Lawngtlai District chhunga COVID-19 hri danna pek tawh dan report ngaihthlak niin, World Health Organisation (WHO) hnuaia Surveillance Medical Officer Dr Lalhlimpuii chuan Tetanus-Diphtheria (Td) vaccine pawimawhna leh routine immunisation pawimawhna chungchang presentation a pe bawk a. Hri danna pek chungchanga harsatna hrang hrang awmte leh ṭha zawk leh felfai zawka kalpui a nih theih nana rawtna hrang hrangte leh chumi atana anganwadi centre leh sikul hrang hranga hma lak dan turte sawi ho zui nghal a ni.

 

Lawngtlai District-ah COVID-19 hri danna (vaccine) hi kum 18 chung lamah January ni 19, 2021 aṭangin pek ṭan a ni a, kum 15 – 17 inkar chu January 7, 2022 aṭanga pek ṭan niin, kum 12 – 14 inkar chu March 21, 2022 aṭanga pek ṭan a ni thung a. Kum 18 chung lam vaccine la thei china ngaih mi 82,359 aṭangin 1st dose la tawh mi 76,691 (93.1%), 2nd dose la tawh mi 59,264 (77.2%) leh precaution dose la tawh mi 4,308 an awm a. Kum 15 aṭanga kum 17 chin target mi 5,384 aṭangin 1st dose la tawh mi 7,391 (137%) leh 2nd dose la tawh mi 4,596 (62.1%) an awm a. Kum 12 aṭanga kum 14 chin target mi 6,127 aṭangin 1st dose la tawh mi 4,343 (70.8%) leh 2nd dose la tawh mi 2,835 (65.2%) an awm bawk a. Lawngtlai District chhungah COVID-19 hri danna leh hri danna hrang hrang pek hna hi tha thlah lovin kalpui reng a ni.

 

Issued by: I&PRO, Lawngtlai