Lawngtlaiah hriselna kawnga hmasawnna tur District Health Action Plan ruahman thlir ho a ni

Hriselna lama tehfung thlan chhuah (Key Performance Indicator) 9 aṭanga teha India rama district hnufual bikte’n hriselna kawnga hma an sawn theih nana kawngkal neia hma lakna tur ruahmanna duang tura sawrkar laipui thupek anga Lawngtlai District-a hma lakna tur  District Health Action Plan (DHAP) ruahman chu vawiin khan Lawngtlai Bawrhsap Pu Amol Srivastava hovin a office chamber-ah thlir ho a ni.

 

He hunah hian District Administration leh Medical lam official-te an tel a. Senior Medical Officer Dr S. Thaizi chuan District Health Action Plan chu pharhin, hun bi tiam chhunga kawngkal neia hma lakna tur ruahman chu a taka kalpui theih dan tur sawi ho a ni.

 

Hriselna kawnga hmasawnna tehfung zingah hian nuin nau a pai laia damdawi lam enkawlna a dawn ṭhat dan te, damdawi in ngeia nau nei tam lam te, hri danna pek ṭhat dan te, naupang hriselna kaihhnawih te, TB Index leh District chhunga Health & Wellness Centre dinhmun te a tel a ni.

 

Issued by : I&PRO, Lawngtlai