Lawngtlaiah “Kawlphetha Kutpui” hman a ni

 India ram zalenna kum 75-na lawmna (Azadi Ka Amrit Mahotsav) kal zelah, vawiin khan Lawngtlai DC Conference Hall-ah Deputy Commissioner (DC) Office Lawngtlai leh Power & Electricity (P&E) Lawngtlai Power Division te ṭang kawp huaihawtin “Kawlphetha Kutpui” (Ujjwal Bharat – Ujjwal Bhavishya Power @2047) hman a ni.

 

He huna Khuallian, Lai Autonomous District Council-a Deputy Chief Whip Pu H. Lalmuansanga chuan kal khawmte chu Kawlphetha Kutpui chibai bukin, kawlphetha hman kawngah rilru fim tak put a pawimawhzia hre thar leh turin a chah a. Khawvel hmasawnna leh changkannain kawlphetha mamawhna a tipung ve zel tih sawiin, kawlphetha luh ngai lohna thingtlangah kawlphetha a luh hnuin kawlphetha hmang chi bungrua leh hmanrua a pung a, chu chuan a ṭha zawnga chhungkaw inelna leh khawtlang hmasawnna a thlen thu a sawi. Kawlphetha deh chhuah chu thil hautak tak a nih avangin renchem taka hman dan thiam a ṭul tiin, consumer-te’n kawlphetha chungchanga ram tana kan tih theih lian ber pakhat chu renchem taka kawlphetha hman a ni tih hriat chian a pawimawh, a ti a. Sawrkarin boruak tichhe lo zawnga kawlphetha deh chhuah dan ngaihtuahin, mi tin ban phaka kawlphetha hnianghnar chhawp tuma hmathlir neiin hma a la mek tih sawiin, chumi a hlawhtlin theih nana ṭha taka sawrkar thawhpui turin kal khawmte chu a chah a ni.

 

He hun hi Additional Deputy Commissioner Pu James Miahlung chuan kaihruaiin, hun hman chhan leh kal khawmte lawmna thu a sawi a. P&E Lawngtlai Power Division-a Sr Executive Engineer, District Nodal Officer ni bawk Er Laldawngliana chuan report a pe a. DC office staff-te aṭangin kawlphetha chungchanga sawrkar hma lakna tar lanna lemchan (Nukkad Natak) thlir ho niin, sawrkar laipui hma lakna, Saubhagya hnuaia a thlawna power connection thlunsak mi 2 hnen aṭangin lawm thu sawina ngaihthlak a ni a. Power Grid Corporation of India (PGCI)-in kawlphetha chungchanga ram hmasawnna leh hmathlir an tar lanna film tawi en ho niin, Sub-Deputy Commissioner Pu H. Vanlalbiakzauva’n lawm thu sawiin hun a khar a ni.

 

“Kawlphetha Kutpui” hi “India Eng – Hma lam Hun Eng” (Ujjwal Bharat – Ujjwal Bhavishya) tih thupui hmangin Ministry of Power ruahmanna anga buatsaih a ni a, India ram district 773-ah hman tura tih niin, Lawngtlai District-ah chuan District hmunpui Lawngtlai-ah leh RD Block ṭhut hmun Bungtlang ‘S’-ah te hman tura ruahman a ni a. He Kutpui hi kawlphetha siam chhuah leh sem darh kawnga kum 2047 thlenga hma lakna tur sawrkar hmathlir puan chhuah nana ruahman niin, Kutpui kharna (grand finale)-ah India Prime Minister chuan India hmathlir hi a tlangzarh dawn a ni.

 

District Nodal Officer report-a tar lan a nih danin, kum riat kal ta chhung khan India ram chuan kawlphetha 169 GW thar chhuah belhin, a hman mamawh bak chuangliam (surplus) a thar chhuak a; kilometre nuai 1.6-a thui transmission line siam belhin, ram pumah frequency pakhat hman vek a ni a, khawvela Grid pakhat hmang ram lian ber a ni a; kum 2018-ah thingtlang khua zawng zawng eng pek theiha thlun zawm fel a ni a; renewable energy siam chhuah kawngah khawvela ram ṭhang chak berte zinga mi niin, kum 2014-a siam chhuah zat 76 GW ni ṭhin chu kum 2021-ah chuan 160 GW-ah a pung chho hman a ni.

 

Lawngtlai District huam chhungah pawh RAPDRP, Saubhagya, DDUGJY leh REDB scheme hmang te’n kawlphetha lamah hmasawnna hmuh chhoh zel a ni a. RAPDRP hnuaiah Lawngtlai khawpui huam chhungah 11kV line km 17-a thui, LT line km 23-a thui leh LT ABC km 4-a thui thlun tawh niin, DT (distribution transformer) 28 bun a ni a, consumer energy meter 2,775 vuahsak an ni a. Saubhagya scheme hnuaiah thingtlang khaw 88 tuamin, a thlawnin connection thar 5,496 thlunsak an ni a; 11kV line km 33.25-a thui leh LT line km 43.37-a thui te thlun tawh niin, DT 70 bun a ni a. DDUGJY hnuaiah 11kV line km 33.5-a thui leh LT line km 14-a thui te thlun niin, DT 10 bun a ni a, consumer energy meter 1,178 vuahsak an ni a. REDB hnuaiah Chawnhu Sub-Station aṭanga Lower Saikah inkar (km 10) leh Chawnhu Sub-Station aṭanga Bungtlang ‘S’ inkar (km 50.63) kawlphetha pekna tihchangtlun hna thawh a ni bawk.

 

Sawrkar laipui ruahmanna thar, Revamped Reforms based and result linked Distribution Sector Scheme (RDSS) hnuaiah Mizoram hmun hrang hranga kawlphetha sem chhuahna tihchangtlunna tur leh mipui tana awlsam zawka bill chawi dan tur te ruahman niin, India ram pumah consumer vaibelchhe 25 zet chu smart meter vuahsak tum a ni a. Hei hi Ujjwal Bharat Grand Finale-ah Prime Minister chuan a puangzar dawn a ni. He scheme hnuaiah hian Mizoram puma energy meter chu pre-paid smart meter-a thlak tur niin, tunah hian hna bul ṭan a ni tawh a. Lawngtlai khawpui chhungah pawh consumer meter thlak bakah hian, Chawnhu Sub-Station aṭanga Lawngtlai Sub-Station inkar 33kV Tower line siam leh Distribution Transformer 23 bun tura ruahman niin, DT awm sa 11 chu a aia ṭha zawka thlak tura ruahman a ni bawk.

 

Issued by : I&PRO, Lawngtlai