Lawngtlaiah Mizoram Khaw Fai Intihsiakna 2022-a Lawngtlai khawpuiin Fastest Mover District Headquarters Award a dawn lawmna buatsaih a ni
Urban Development & Poverty Alleviation (UD&PA) Department-in Mizoram Khaw Fai Intihsiakna (Mizoram Cleanliness Competition) 2022 a buatsaiha Lawngtlai khawpuiin Fastest Mover District Headquarters Award a dawn chu vawiin khan Lawngtlai DC Conference Hall-ah a lawmna hun buatsaih a ni.
He hunah hian Lawngtlai Town Sanitation Task Force Chairman, Lawngtlai Bawrhsap Pu Amol Srivastava chuan Mizoram district hmunpuite zinga faina kawnga hmasawn chak ber nih chu Lawngtlai mipuite tan thil lawmawm leh lawm tlak tak a nih thu a sawi a. Lawngtlaiin faina kawnga chak taka hma a sawn theih chhan chu mipui ṭan rualna avang a nih thu sawiin, hma latu UD&PA Department te, LADC hnuaia a kaihhnawih – Sanitation, LAD leh Revenue department-te bakah department dangte, state hnuaia department hrang hrangte, village council-te, tlawmngai pawl hrang hrangte, kohhran, zirna in, media leh local ambassador te, children sanitation club leh Lawngtlai mipui zawng zawng chungah lawm thu a sawi a. Faina kawngah hnungtawlh a thiang tawh lo tiin, hma sawn zel tura thapui chhuah turin Lawngtlai mipuite chu a chah a ni.
He hunah hian Lai Autonomous District Council-a Executive Member i/c Pu Lalropuia Chinzah chuan Lawngtlai khawpuiin Award a dawn chu chona thar petua hmang a, a aia sang thleng tura theih tawp chhuah chhunzawm turin Lawngtlai mipuite a sawm a. Faina kawngah hmasawnna duhawm tak a awm zel theih nan LADC Sanitation Department chuan February 2023 aṭangin uluk zawka bawlhhlawh thliar hran kalpui turin Electric Veng, AOC Veng leh Lawngtlai-III-ah te hma lak a tum thu leh February thla chhungin leivung paihna felfai zawk ruahman a tum thu a sawi bawk.
Mizoram Cleanliness Competition (MCC) 2022-a Lawngtlai khawpuiin Fastest Mover District Headquarters Award a dawn lawmna hun hi UD&PA Lawngtlaia District Project Officer Pi TT Beikhaizi chuan a kaihruai a. LIKBKṬP Secretary Rev. Lalropeka Chinzah chuan hunserh hmangin, hun kaihruaituin report a pe a. Faina kawnga nasa taka UD&PA Department hma lakpuitu Lawngtlai District Village Council Association leh Mizoram Journalists’ Association Lawngtlai District te chu certificate of appreciation hlan an ni a. Khaw Fai Intihsiakna kalpui chhunga Lawngtlai khawpuia faina kawnga hma lakna chhuanawm deuh deuh zinga mi, eco bricks siam kalpui a nih dan video tawi thlir ho niin, Swachhata Warrior Pu Elvis Lalthangzuala hnen aṭangin thu sawi ngaihthlak a ni bawk a. MCC 2022 Sub-Committee Chairman, Additional Deputy Commissioner Pu Abraham Beirazi Khithie chuan lawm thu sawiin hun a khar a ni.
MCC 2022-ah hian category pathumah inelna buatsaih niin, special award panga (5) siam a ni a. Special award zinga pakhat, District hmunpui zinga faina kawnga hmasawn chak ber lawmman, “Fastest Mover District Headquarters Award” chu Lawngtlai khawpuiin dawngin, he Award hian ₹ 55,555/- leh citation a keng tel a. Award hi Aizawla Republic Day, 2023 lawmnaah Lawngtlai District UD&PA leh LADC Sanitation Department ai awhte’n Mizoram Larsap Pu Hari Babu Kambhampati kut aṭangin an dawng a ni.
MCC 2022 atana Lawngtlai khawpui inbuatsaihnaah Sub-Committee din niin, August ni 20, 2022 khan faina beihpui thlak hawnna hun hmangin, hma lak chhoh a ni a. Kum tluanin zirna in, sunday school leh hmun hrang hrangah faina inzirtirna hun hman niin, sawrkar department, village council, tlawmngai pawl, kohhran leh pawl hrang hrang leh mimal te’n hnatlangin faina beihpui an thlak reng a. Veng hrang hrangah children sanitation club din niin, local ambassador-te kaihhruaina hnuaiah faina hnatlang an thawk ṭhin a. College leh School-a NSS leh Eco Club te’n faina kawnga hma lakna hrang hrang kalpui bawkin, mipui ṭan rualna avangin Lawngtlai khawpui chu Mizoram District hmunpuite zinga faina kawnga hma sawn chak bera thlan a lo ni ta a ni.
Issued by : I&PRO, Lawngtlai