Lawngtlaiah Mock Drill on Earthquake buatsaih a ni
Tarchhuah NI : 03/04/2023
Vawiin khan Lawngtlai District Disaster Management Authority (DDMA) leh National Disaster Response Force (NDRF) te ṭang kawp huaihawtin Lawngtlaiah lirnghing vanga chhiat rupna a lo thlen thulha chet lak dan tur en chhinna (mock drill on earthquake) buatsaih a ni.
Chawhnu dar 2-ah Lawngtlai Bazara Areopagy aṭangin chhiatna thlen hriattirna (disaster siren) tihrik niin, mock drill hi tan a ni a. Lirnghingin Lawngtlai khawpuiah chhiatna a thlen anga tih chhin niin, chhiatna tenau hmun hrang hranga thleng karah Lawngtlai Bazara Areopagy chu chhiatna thlenna pui ber anga lantirin, in chim leh kangmei chhuak kara chhanchhuah hna thawh dan leh thil tih dan tur a taka chan chhin a ni. Chhiatna thlen veleha mipui insaseng dan tur te, chhiatna thleng chungchang thuneitute hnena hriattir thuai dan tur te, a bul hnaia awm khawtlanga tlawmngai pawlte’n chhanchhuah hna an thawh nghal dan tur te, police lamin motor tlan dan an thunun a, chhiatna thlenna hmun an ven dan tur te, kang ṭhelhtute leh line department hrang hrangin an mawhphurhna an hlen dan tur te, hliam tuarte’n damdawia enkawlna an dawn thuai theih nana medical team-in an tih tur leh damlo enkawl hmasak ngai leh na vak lote thliar dan tur te, damdawi ina phurh dan tur leh chhanchhuaktu pawl lian zawk NDRF te hmanraw chi kim nen an lo thlen huna an chet lak dan tur te enchhin a ni.
He mock drill-ah hian District Administration, District Police, Medical, Fire & Emergency Services leh state department hrang hrang bakah, NDRF leh DM&R hnuaia QRT te leh khawtlang hruaitu leh tlawmngai pawl te chuan chhiatna thlen thulha an chet dan tur ang takin en chhinna hi an kalpui a ni.
He mock drill atan hian chawhma dar 10-ah Lawngtlai Additional Deputy Commissioner & DDMA Chief Executive Officer Pu Abraham Beirazi Khithie hovin table top exercise leh briefing neih a ni a. Mock drill buatsaih zawh hian debriefing neih leh niin, mock drill chungchang thlir hona leh hmasawnna tur rawtna hrang hrang sawi hona hun hman a ni.
Issued by : I&PRO, Lawngtlai