Lawngtlaiah MYC hnuaia vawk vulh training tan a ni

Mizoram Youth Commission (MYC)-in thalai, phai lama hna thawka awm, COVID-19 hri leng vanga Mizorama lo haw, hna thawh tur mamawhte’n eizawnna an neih theih nana thiam thil chi hrang hrang zirtirna (training) a ruahman zinga pakhat, MYC, Core Team Committee on Skill Development Framework, Lawngtlai District leh AH & Vety Department te tang hovin an huaihawt ni 15 awh tur vawk vulh training chu vawiin khan Lawngtlai District tan AH & Vety Farmer Training Hall, Lawngtlaiah tan a ni.

Training hawnna hun tawi buatsaiha Khuallian, Lawngtlai Bawrhsap Dr Andrew H. Vanlaldika chuan tum bulfuk nei ngai lo chu eng kawngah mah mi hlawhtling an ni ngai lo tih sawiin, hlawhtling tur chuan tih tak zetna neih a pawimawh thu a sawi a. Vawk vulh chu ei zawnna atana tha leh thlanawm tak a nih thu sawiin, vawk vulh dan zir tura thlante chu thahnem ngai taka an zir turte zir a, vawk vulhtu hlawhtling nih tum turin a chah a ni.

Training hawnna hun hi Sub-Divisional Officer (Sadar) Pi TT Beikhaizi chuan a kaihruai a. District Veterinary Officer Dr Thanseia Chhangte chuan thu a sawi bawk.

Tun tuma vawk vulh training tur hian mi 20 thlan chhuah an ni a. Training hi ni 15 chhung neih tur niin, AH & Vety Department atangin DVO Dr Thanseia Chhangte leh CVO Dr Charlie C. Chawngthu te bakah, KVK Lawngtlaia SMS (Animal Science) Dr Lalthazuali leh LADC-a DCVO Dr Lalnunpuia Chinzah te’n zirtirna an pe dawn a ni.

Issued by:I&PRO, Lawngtlai