Lawngtlaiah Pratham Foundation bul tuma zirtirtu training kalpui tura master trainer turte tan training buatsaih a ni

Lawngtlai Bawrhsap Dr Andrew H. Vanlaldika hma laknaa Lawngtlai District chhunga zirna tihhmasawn nana Pratham Foundation nen tang duna pawl nga atanga pawl sawmpahnih inkar zirtirtute tana capacity development training ruahmana middle school master trainer tur mi 30 thlan chhuahte tana ni thum awh training buatsaih chu vawiin khan Lawngtlai DC Conference Hall-ah tan a ni.

He training hi Lawngtlai Sub-Divisional Officer (Sadar) Pi TT Beikhaizi chuan hmanpuiin, Lawngtlai District chhunga zirnain hma a sawn theih nana hmanraw tangkai tak ni turin a hawng a. Samagra Shiksha, Lawngtlai District-a Additional District Project Coordinator Pu H. Laltanpuia’n hun kaihruaiin, inlawmna thu a sawi a. Gurushala team-te’n training hi an pe a ni.

Pratham Foundation te hian Vodafone Idea Foundation leh Indus Towers Limited te nen tang tlangin “Gurushala Teachers’ Training” tih hming chawiin district administration te nen thawk hovin a thlawnin zirtirtute training an buatsaih thin a. Lawngtlai District-ah pawh district administration leh District chhunga MLA te nen tang hovin sawrkar sikul zirtirtute tan training hi kalpui tura ruahman a ni.

Training hi batch 2-a kalpui tum niin, 1st batch-ah Class V – VIII zirtirtute leh 2nd batch-ah Class IX – XII zirtirtute tan training hi kalpui tum a ni a. Ni 2 awh online induction training buatsaih a nih hnuah Master Trainer tur thlan chhuah niin, vawiin atang khan 1st batch (middle school) Master Trainer turte chu Lawngtlai DC Conference Hall-ah Gurushalla team te’n ni thum awh tur training an rawn pe tan a. He’ng Master Trainer-te hian Gurushala portal hmangin District chhunga zirtirtu dangte chu kum khat chhung online training an pe ve leh thin dawn a ni.

Issued by: I&PRO, Lawngtlai