Lawngtlaiah Remna Ni vawi 37-na lawm a ni

Kum 1986 June ni 30-a India sawrkar leh Mizo National Front (MNF) te’n “Remna Thuthlung” (Peace Accord) an thlun fel ni hriat reng nana Mizorama kum tina hman ṭhin, “Remna Ni” chu vawiin khan Lawngtlai DC Conference Hall-ah Mizoram Legislative Assembly Speaker Pu Lalrinliana Sailo hovin hman a ni.

 

Speaker Pu Lalrinliana Sailo chuan remna leh muanna a awm theih nana sulsutute zahna chibai a buk a. Zalenna sualtu Hnam Sipaite kha an zam lo va, an tlawm hek lo va, rambuai hun thim hrehawm takin Mizoram a tuam karah mipuiin kan tuar nasain, kan tlin ta si lo va, remna kawng zawh a ngai ta a ni, a ti a. Remna a awm theih nan ram mipui zawng zawng ṭang rualin theih tawp chhuaha hma lak a ni a, remna kan neih hi kan zavaia thawh rah a ni, a ti.

 

Speaker chuan remna chuan rah ṭha a chhuah chho zel a, remna leh muanna awmna State, ralmuang bawk si-ah hian engtin nge hmasawnna nasa zawk kan neih theih ang tih hi ngun taka ngaihtuah a ngai a ni, a ti a. A bikin Lawngtlai District tan Kaladan Multi Modal Transit Transport Project chu ram dinhmun dawm kanna tur pawimawh tak a ni tiin, a nih tur anga peih fel a ni thei mai lo chu pawi a tih thu sawiin, hmasawnna rawn luang lut tur a khawtlai phah a ni, a ti.

 

Lai Autonomous District Council (LADC)-a Chief Executive Member Pu V. Zirsanga pawhin thu sawiin, Mizoramin remna a neih chu a chhuanawm tak zet a, Peace Accord chuan a hnu lamah boruak duhawm lo, phuba lakna lam hawi te hrin chhuah a nei miah lo chuan Lalpa hriatpui remna a ni tih a tilang chiang hle a ni, a ti.

 

Lawngtlaia Remna Ni hmannaah hian District Bawrhsap Pu Amol Srivastava chuan inlawmna thu sawiin, Baptist Church of Mizoram Lawngtlai Area-a Executive Secretary Rev. Dr H. Lalthlamuana’n hunserh a hmang a. Lawngtlai District Information & Public Relations Office-in Remna Ni 2022 puala video tawi an siam chu thlir ho a ni a. Zaithiam zai te ngaihthlak niin, Additional Deputy Commissioner Pu James Miahlung chuan lawm thu sawiin hun a khar a ni.

 

Lawngtlaia Remna Ni hmannaah hian LADC leh State sawrkara official-te, tlawmngai pawl hruaitute, political party ai awhte leh chanchinbu mite an tel a. Remna thingpui ruai an kil ho nghal a ni.

 

Pu Laldenga kaihhruai Mizo National Front (MNF)-in March ni 1, 1966-a India sawrkar laka Mizoram zalenna a puan hnuah sawrkar laipui chuan Mizoram chu ‘ram buai’ (disturbed area)-ah puangin, sipai chakna hmanga MNF tuk dawl leh Mizo hnam harh tharna boruak hmeh mih tumin hma a la a. Kum 20 chhung zet Mizoram chu rambuai dinhmuna a awm hnuah mipui tuarna tihtawp a nih theih nan June ni 30, 1986-ah India sawrkar leh MNF chuan “Remna Thuthlung” an ziak ta a. Hemi ni aṭanga kum 36 ral hnu, vawiin thleng hian Mizoram chu India rama state ralmuang berte zinga mi a la ni ta reng a ni.

 

Issued by : I&PRO, Lawngtlai