Lawngtlaiah RTI Week pualin hun hman a ni

October ni 6 atanga ni 12, 2022 inkar chhunga Right to Information (RTI) Week hman mek pualin vawiin khan Lawngtlai DC Conference Hall-ah Lawngtlai Bawrhsap Pu Amol Srivastava hovin hun hman a ni.

Lawngtlai Deputy Commissioner office huaihawta RTI Week puala hun hmanah hian Bawrhsap Pu Amol Srivastava chuan RTI chu programme pakhat mai emaw, kar khat mai emawa a puala hun hmana tlingtlak mai chi ni lovin, sawrkar hna thawhnaah tangkai taka hman chhunzawm reng tur a nih thu a sawi a. Sawrkar leh mipui inkara inhriat pawhna tha siam tura RTI pawimawhzia hre thar tur leh danin a phut ang taka RTI chu kalpui turin sawrkar hna thawk kal khawmte chu a chah a. RTI chu hmanraw tangkai tak a nih rualin, District mipuite pawh sawrkar hna thawh tibuai zawng ni lovin, a puibawm leh nawr kal zawnga RTI chu hman tum hram hram turin a chah bawk.

RTI Week puala hun hman hi Lawngtlai Additional Deputy Commissioner Pu James Miahlung chuan a kaihruai a. Kal khawmte’n hun tan nan “Aw Nang, kan Lal kan Pathian” tih hla sa hovin, LIKBK Associate General Secretary Rev. Dr LH Lalpekhlua chuan hunserh a hmang a. October ni 6, 2022-a Departmental Appellate Authority (DAA), State Public Information Officer (SPIO) leh State Assistant Public Information Officer (SAPIO) te puala District Level RTI Training buatsaiha telte hnena certificate hlanna hun hman niin, a duh apiang tan thu sawina hun hawn a ni a. Lawngtlai DIPRO & District Resource Person Pu C. Lalhruaitluanga chuan lawm thu sawiin hun a khar a ni.

Vawiina Lawngtlaia RTI Week puala hun hmanah hian sawrkar official – DAA, SPIO leh SAPIO te, tlawmngai pawl ai awhte leh RTI activist-te an kal khawm a ni.

Issued by: I&PRO, Lawngtlai