LAWNGTLAIAH NATIONAL DEWORMING DAY HMAN A NI

February ni 10, 2020 khan Lawngtlai Chandmary Venga Jehovah Jireh Higher Secondary School-ah National Deworming Day (NDD) hman niin, February thla chhunga naupangte hnena rulhut hlo pek runpui neih tur chu Lawngtlai District tan Additional Deputy Commissioner Pu K. Laltlawmlova, MCS chuan a hawng.

 

Pu K. Laltlawmlova chuan naupangte chu faina leh thianghlimna nunpui tura chahin, chu chu hriselna thuruk a nih thu a sawi a. Sawrkarin sum tam tak senga an hriselna tur a ruahmansak chu tihlawhtling a, rulhut hlo chu tha taka ei theuh turin zirlaite chu a chah.

 

He hun hi Lawngtlai Chief Medical Officer Dr Lalthlamuana’n kaihruaiin, National Health Mission (NHM) Lawngtlai District-a District Programme Manager Pi Lalkhawngaihdawngi Chinzah chuan National Deworming Day thuchah a sawi a. NDD chu kum tin vawi hnih, February leh August thlaah hman thin a nih thu leh naupang kum 1-19 inkar hnenah rulhut hlo, Albendazole Tablet a thlawna pek thin a nih thu sawiin, NDD chu rulhut hlo eina ni chauh ni lovin, rulhut hlo pai lo tura mahni invawn fai leh kut sil fai te inzirtirna ni a nih tel thu a sawi a. Kut sil dan tur entirna (demonstration) hun hman niin, Khuallian leh official dangte’n zirlai naupangte chu rulhlut hlo an eitir nghal a. RKSK Co-Ordinator Pi Lalduhawmi Tlau chuan lawm thu sawiin, hun khar a ni.

 

Tun tum NDD (thawh khatna)-ah hian rulhut hlo hi sikul hrang hrangah zirlaite pek niin, sikul la kal lote chu anganwadi centre hrang hrangah pek an ni thung ang a. Vawiin February ni 10-a ei hman lo tan February ni 17 hian ei theihna hun (mop up) buatsaih leh a ni ang.

 

Issued by : I&PRO, Lawngtlai