Close

10th CADC-a CEM 5-na atan Pu Buddha Lila Chakma lak luh a ni

Publish Date : 16/06/2022
Vawiin khan 10th Chakma Autonomous District Council (CADC)-a Chief Executive Member (CEM) atana ruat thar, 13-Vaseitlang MDC bial aṭanga thlan tlin Pu Buddha Lila Chakma chu Chawngtea CADC Rest House tualah Lawngtlai Bawrhsap Pu Amol Srivastava chuan rinawmna thu tiamtirin a la lut.
 
CEM thar lak luh inkhawm hi CADC-a Executive Secretary Pu Pronit Bikash Chakma chuan kaihruaiin, CADC (Constitution, Conduct of Business, etc.) Rules, 2002 rule 22 sub-rule (3) tlawh chhana CEM atana Pu Buddha Lila Chakma ruatna sawrkar notification No. A. 43016/3/2018-DC&MA(C) Dt. 7th June, 2022 chu a chhiar chhuak a. Hemi hnu hian Lawngtlai Bawrhsap chuan CEM hi a la lut nghal a. CEM thar Pu Buddha Lila Chakma chuan thu a sawi bawk.
 
10th CADC-a CEM 4-na Pu Rasik Mohan Chakma chu May ni 9, 2022 khan CADC Budget Session-ah no-confidence motion hmangin paih thlak a ni a. Hemi hnua MNF Legislature Party Leader atana thlan, Pu Buddha Lila Chakma chu Mizoram Governor-in June ni 3, 2022-a CADC CEM atana a pawmpui hnuah vawiin khan CEM thar lak luhna hi buatsaih a ni ta a ni.
 
Pu Buddha Lila Chakma hi CADC term hmasaah khan CEM lo ni tawhin, tun hi CEM a nih ṭum hnihna tur a ni a. Tun 10th CADC term chhung hian Chairman nihna ṭum hnih a lo chelh tawh bawk.
 
Kum 2018 April thlaa 10th CADC Inthlanpuiah khan seat 20 awmah MNF-in seat 8, INC-in seat 7 leh BJP-in seat 5 an la a. BJP leh INC ṭang dunin Executive Committee dinin, BJP ticket-a thlan tlin Pu Shanti Jiban Chakma chu CEM hmasa ber a ni a. Thla riat vel hnuah INC MDC palite thlawpnain MNF chuan sawrkarna rawn chang ve lehin, Pu Rasik Mohan Chakma chu CEM a ni a. April 2021-a CEM ni lai Pu Rasik Mohan Chakma-in banna a theh luh avang khan Pu Durjya Dhan Chakma chu CEM ni ve lehin, thla 6 hnuah Pu Rasik Mohan Chakma chuan a rawn luahlan ve leh a. Tuna boruak dang a awm leh hma hian CEM nihna hi thla 7 vel a chelh leh hman a ni.
 
Term laklawha boruak inthlakthleng avangin tun dinhmunah CADC-a elected MDC zawng zawng (20) chu MNF-ah an awm vek tawh a ni.
 
Issued by : I&PRO, Lawngtlai