Lawngtlaiah LADC & CADC hnuaia VC by-election neih tura hman tur final VC roll tlangzarh a ni

Lawngtlai District chhunga Lai Autonomous District Council (LADC) hnuaia village council pali leh Chakma Autonomous District Council (CADC) hnuaia village council paruka by-election buatsaih tura hman tur final electoral roll chu vawiin khan Lawngtlai District Election Officer (DEO), Lawngtlai Bawrhsap Dr Andrew H. Vanlaldika chuan a office chamber-ah a tlangzarh a. Final roll hi political party ai awhte hnenah a hlan nghal.

 

Dr Andrew H. Vanlaldika chuan by-election neih tura hman tur draft electoral roll chu tun thla ni 12-a tlangzarh niin, hun chep tak kara final roll felfai tak peih fel leh tlangzarh theih a ni chu lawmawm a tih thu sawiin, thawktute thawhrimna fakawm a tih thu a sawi a ni.

 

LADC hnuaia 3-Mualbu L, 40-Darnamtlang, 86-Lungpher South leh 91-Vawmbuk-II VC-ahte general seat pakhat theuh hnawh khah tur a awm a. Final roll atanga a lan danin, Mualbu L-ah voter 250 (mipa 129 & hmeichhia 121), Darnamtlangah voter 220 (mipa 114 & hmeichhia 106), Lungpher South-ah voter 1,094 (mipa 529 & hmeichhia 565) leh Vawmbuk-II-ah voter 270 (mipa 140 & hmeichhia 130) an awm a ni.

 

CADC hnuaia 58-New Jognasury-I leh 72-Samuksora VC-ahte general seat pakhat ve ve, 37-Ajasora-II leh 80-Parva-IV VC-ahte general seat panga ve ve leh reserved seat pakhat ve ve, 4-Borapansury-II VC-ah general seat paruk leh reserved seat pakhat, 84-Kamalanagar-V VC-ah general seat pahnih leh reserved seat pakhat hnawh khah tur a awm a. Final roll atanga a lan danin, Borapansury-II-ah voter 1,168 (mipa 593 & hmeichhia 575), Ajasora-II-ah voter 380 (mipa 193 & hmeichhia 187), New Jognasury-I-ah voter 576 (mipa 280 & hmeichhia 296), Samuksora-ah voter 147 (mipa 74 & hmeichhia 73), Parva-IV-ah voter 399 (mipa 215 & hmeichhia 184) leh Kamalanagar-V-ah voter 365 (mipa 170 & hmeichhia 195) an awm a ni.

 

Issued by:I&PRO, Lawngtlai