Chawngteah Block Level Health Mela buatsaih a ni

Ministry of Health and Family Welfare, Govt of India-in India Independence kum 75-na lawmna, “Azadi ka Amrit Mahotsav” puala April ni 18 – 29, 2022 inkar chhunga India ram chhung block tina health mela (hriselna kutpui) buatsaih tura a ruahman angin, vawiin khan National Health Mission (NHM), Health & Family Welfare Department huaihawtin Chawngte Block tan Kamalanagar Public School-ah block level health mela buatsaih a ni.

 

He hunah hian Chakma Autonomous District Council (CADC) Chief Executive Member Pu Rasik Mohan Chakma chu Khuallian a ni a. Chawngte block huam chhunga mite’n an mamawh tak health mela buatsaih a ni chu lawmawm a tih thu sawiin, a ṭangkai thei ang bera chhawr tum turin mipuite chu a chah a. CADC huam chhungah damlo inenkawlnaa sum sen avanga chhungkaw khawsakin a tuar phah tam tak an awm a hriat thu sawiin, sawrkarin health care scheme ṭha tak a neih – Mizoram State Health Care Scheme (MSHCS) leh Ayushman Bharat – Pradhan Mantri Jan Arogya Yojana (AB-PMJAY) te hlutna hriain, inziak lut se, chuti ang hatsatna chu pumpelh theih a ni, a ti.

 

Chawngte Block tana health mela buatsaihah hian Community Health Centre (CHC), Chawngte leh District Hospital Lawngtlai aṭangin doctor-te leh NHM hnuaia thawktute chuan clinic leh stall hrang hrang an hawng a. He’ngah hian mipui tana a thlawna inentirna leh counselling hrang hrang buatsaih niin, hri danna te pek a ni a, a theih chin chinah a thlawnin damdawi sem a ni bawk. Stall hrang hrang zingah hian inkai chhawn theih loh natna (non-communicable disease), zuk leh hmuam kaihhnawih (tobacco), rilru hriselna (mental health), HIV/AIDS kaihhnawih (MSACS), mit entirna, ha entirna leh NHM hnuaia programme hrang hrang inphona hmun te buatsaih niin, Ayushman Bharat Digital Mission hnuaia India khua leh tui tinin hriselna kaihhnawih ID hran (Unique Health ID) an neih tur atana lo inziah lawk theihna te, AB-PMJAY Golden Card siamna hmun te buatsaih a ni bawk.

 

Lawngtlai District chhunga block 4-ah block level health mela hi kalpui mek niin, April ni 18 khan Lawngtlai Block tan Govt Region Higher Secondary School, Lawngtlaiah health mela hi buatsaih a lo ni tawh a. Vawiin khan Chawngte Block tan Kamalanagar Public School, Chawngte-ah buatsaih ni ve lehin, April ni 22 (Zirtawpni)-ah Bungtlang ‘S’ Block tan Bungtlang ‘S’-ah leh April ni 26 (Thawhlehni)-ah Sangau Block tan Sangau-ah te buatsaih leh tura ruahman a ni.

 

Issued by: I&PRO, Lawngtlai