Bungtlang ‘S’-ah Block Level Health Mela buatsaih a ni

Ministry of Health and Family Welfare, Govt of India-in India Independence kum 75-na lawmna, “Azadi ka Amrit Mahotsav” puala April ni 18 – 29, 2022 inkar chhunga India ram chhung block tina health mela (hriselna kutpui) buatsaih tura a ruahman angin, vawiin khan National Health Mission (NHM), Health & Family Welfare Department huaihawtin Lawngtlai District-a Bungtlang ‘S’ Block tan Synod Home Mission School, Bungtlang ‘S’-ah block level health mela buatsaih a ni.

 

He hunah hian Lawngtlai West Bialtu MLA Pu C. Ngunlianchunga chu Khuallian a ni a. Lawngtlai District khawthlang lam chu hriselna kawngah hmun dang aia ngaihven leh tihchangtlun ngai zual a la nih thu sawiin, tun ṭumah Bungtlang ‘S’ Block huam chhung mipuite’n an mamawh tak health mela buatsaih a ni chu lawmawm a tih thu a sawi a. Mipuite’n ṭangkai taka chhawr tum turin a chah a ni. 

 

He hun hi Bungtlang ‘S’ BDO Pu Hmingmawizuala’n a kaihruai a. Lawngtlai Chief Medical Officer Dr LP Malsawma hnen aṭangin thusawi ngaihthlak niin, Dr Elsadai B. Lalbersiama’n lawm thu a sawi a ni.

 

Bungtlang ‘S’ Block tana health mela buatsaihah hian Primary Health Centre (PHC), Bungtlang ‘S’ leh District Hospital Lawngtlai aṭangin doctor-te leh thawktute, NHM leh Health Department hnuaia programme hrang hrangin clinic leh stall hrang hrang an hawng a. He’ngah hian mipui tana a thlawna inentirna leh counselling hrang hrang buatsaih niin, hri danna te pek a ni a, a theih chin chinah a thlawnin damdawi sem a ni bawk. Stall hrang hrang zingah hian inkai chhawn theih loh natna (non-communicable disease), zuk leh hmuam kaihhnawih (tobacco), rilru hriselna (mental health), HIV/AIDS kaihhnawih (MSACS), mit entirna, ha entirna leh NHM hnuaia programme hrang hrang inphona hmun te buatsaih niin, Ayushman Bharat Digital Mission hnuaia India khua leh tui tinin hriselna kaihhnawih ID hran (Unique Health ID) an neih tur atana lo inziah lawk theihna te, AB-PMJAY Golden Card siamna hmun te buatsaih a ni bawk.

 

Lawngtlai District chhunga block 4-ah block level health mela hi kalpui mek niin, April ni 18 khan Lawngtlai Block tan Govt Region Higher Secondary School, Lawngtlaiah health mela hi buatsaih a lo ni tawh a. Nimin khan Chawngte Block tan Kamalanagar Public School, Chawngte-ah buatsaih ni ve lehin, vawiin khan Bungtlang ‘S’ Block tan Synod Home Mission School, Bungtlang ‘S’-ah buatsaih a ni bawk a. April ni 26 (Thawhlehni) khian Sangau Block tan Sangau-ah buatsaih leh tura ruahman a ni.

 

Issued by: I&PRO, Lawngtlai