Lawngtlaiah Lawngtlai District chhunga ram kang ven kawnga hma lak dan tur chungchangah inrawn khawmna buatsaih a ni

 

He hun hmanpuitu Lawngtlai Bawrhsap Dr Andrew H. Vanlaldika chuan kangmei chhuakin a nghawng tam zawk chu a taka kan tuar nghal ṭhin thil a nih avangin kangmei ven kawnga hma laknaah inthlahdah a rem lo tih a sawi a. Nikuma Mizoram hmun hrang hranga ram kang khan a buaithlakzia leh ramin a tuar nasatzia a lan chiantir hle a ni tiin, kang ṭhelhna hmanrua duhthusama kan neih ṭhat loh avang leh ram leilungin a zir loh avangin Forest department, VC leh tlawmngai pawlte an hah hle tih a sawi a. Hei vang hian kangmei venna kawngah awmze nei zawka hma lak dan ngaihtuah a ṭul a ni, a ti.

 

He hun hi Lai Autonomous District Council (LADC)-a Deputy Conservator of Forests Pu C. Sangliana’n a kaihruai a. District Council Conservator of Forests Pu K. Lalromawia’n kangmei venna kawnga hriat tur pawimawh leh hma lakna awm mekte a sawi fiah a. Kal khawmte chu pawl thumah inṭhenin, kangmei chhuakin harsatna a thlen dan te, kangmei chhuah chhan leh sawrkar leh kohhran, tlawmngai pawl leh mimal mawhphurhna hrang hrang te leh kangmei laka Lawngtlai District a him zawk theih nana hma lakna tur rawtna hrang hrangte an sawi ho va. LADC-a Range Officer (Headquarters) Pu B. Lalrinmuanpuia’n lawm thu sawiin hun a khar a ni.

 

Forest Survey of India (FSI)-in a chhut danin kum 2004 – 2017 chhung khan Mizoramah ram kang hmun 32,659 zet a awm a, India ramah a tam ber a ni. Mizoram pumah ram kang (forest fire) hi November 2018 – June 2019 inkar khan hmun 7,597; November 2019 – June 2020 inkar khan hmun 7,361 leh November 2020 – June 2021 inkar khan hmun 12,846-ah a thleng a ni.

 

Issued by: I&PRO, Lawngtlai