Assembly Speaker Pu Lalrinliana Sailo-in Zorinpui tlawhin, KMMTTP kawngpui sial mek a enfiah

Mizoram Legislative Assembly Speaker Pu Lalrinliana Sailo chuan vawiin khan ram dang nena insumdawn tawnna kawtchhuah tur Lawngtlai District-a Zorinpui chu tlawhin, Lawngtlai aṭanga Zochachhuah inkara Kaladan Multi Modal Transit Transport Project (KMMTTP) kawngpui sial mek leh Myanmar ram chhung lama kawng laih hna thawh kal lai dinhmun a enfiah.

 

Speaker chuan Mizoram chhung bika KMMTTP kawngpui sial mek chu ṭha thawkhat a tih thu sawiin, hna pawh an zo titih tawh chu lawmawm a tih thu a sawi a. Chutih ruala Zochachhuah aṭanga Myanmar (Kaletwa-Paletwa) kawng laih hna a muang lutuk leh tun thlenga hma lakna mumal a awm lo chu pawi a tih thu sawiin, thuneitu sangte hnena bawhzui vat a tum thu a sawi. 

 

Tun dinhmunah Lawngtlai aṭanga Zochachhuah inkar KMMTTP kawngpui sial mek hi hna 96.4% thawh zawh tawh niin, lei 8 dawh turah lei 6 dawh zawh tawh a ni a, lei la dawh zawh loh hi hmun hnihah a la awm thung. KMMTTP kawngpui Mizoram chin hi kum 2010 aṭanga thawh ṭan niin, kumin December 2022-a hawn hman tum a ni.

 

Zochachhuah aṭanga Kaletwa inkar hi km 48 niin, Kaletwa aṭanga Paletwa hi km 60 a ni thung a. He hna hi Ministry of External Affairs enkawlna hnuaiah Engineering Projects (India) Ltd RKRPP (JV) Company te’n thawk mekin, he kawng hian Myanmar ram chhunga khaw 24 a tan tlang dawn a. Tunah hian pilot cutting km 21 vel kawng sial a ni tawh a, Mizoram sawrkar kal tlanga hna thawh a nih loh avangin Myanmar ram buai leh foreign thil a nihnaah beisei angin hmasawnna a kal chak thei lo a ni. 

 

Speaker Pu Lalrinliana Sailo hi Lai Autonomous District Council-a Executive Member-te – Pu Lallawmsanga Apetow, Pu C. Rongura, Pu BN Thangpuia leh Pu C. Hrangthianga te bakah, PWD Multi Modal Project Division Lawngtlaia Executive Engineer Er Vanlalvuana, Sub-Deputy Commissioner Pu H. Vanlalbiakzauva leh sawrkar official dangte leh MNF District Headquarters Lawngtlai hruaitute leh party mi leh sate’n an ṭawiawm a ni.

 

Issued by : I&PRO, Lawngtlai