Lawngtlaiah India ram zalenna champha phak vawi 75-na lawm a ni

India ramin zalenna a hmuh champha phak vawi 75-na chu ram chhung hmun dang rualin vawiin khan Lawngtlaiah pawh urhsun takin lawm a ni a. A lawmna pui ber Central YLA Playground-a buatsaihah Sports & Youth Services Minister Pu Robert Romawia Royte chu Khuallian a ni.

Sawrkar Laipui ruahmannaa August ni 13 aṭanga ni 15 chhunga in tina Ram Puanzar zar tur tih a nih angin Lawngtlai District chhunga sawrkar pisa, hmun pawimawh dang leh mimal in tinah India Ram Puanzar zar a ni a. Independence Day ni bikah hian zing dar 8:30-ah CYLA Playground-ah Khuallianin Ram Puanzar pawt pharhin, Ram Puanzar chibai buktu parade contingent 20 te chibai buk a chhang let nghal bawk.

Khuallian Pu Robert Romawia Royte chuan mipui pung khawmte chu zalenna chibai bukin, India ram zalenna atana beitu hnam pasalṭhate hre renga zahna chibai buk thar a, an thisen leh thlantui hmanga an valh sa India ram ropui nan leh hmasawn zel nan theih tawp chhuah turin a sawm a. COVID-19 dona kawnga sawrkar, tlawmngai pawl, kohhran leh mipui ṭan rualna avanga mipuiin boruak zalen zawk kan hip leh thei chu thil lawmawm tak a nih thu sawiin, tun hnaia hri lo hluar thar leh avangin mipuite chu hmai tuam ṭhat leh kut sil fai uar a, fimkhur chhunzawm zel turin a chah a. Myanmar raltlante chhawmdawl kawnga Lawngtlai District mipuite chet dan mawi tak chu fakin, an hna thawh ṭha chu chhunzawm zel turin a ngen bawk.

Khuallian chuan Lawngtlai District-ah District Administration leh District Council te’n thawh hona ṭha tak an neih thu a sawi a. LADC hnuaia hmasawnna hna thawh hrang hrang zingah Tribal Sub-Scheme sum hmanga sak Vawmbuka Community Centre leh Lawngtlai daia Skill Development & Training Centre te chu 95% thawh zawh a nih tawh thu leh Lawngtlai Vengpuia Tribal Girls Hostel sak hna chu 85% thawh zawh a nih tawh thu a sawi.

Khuallian chuan District mipuite hrisel nana Health Department hma lakna fakin, District Hospital Lawngtlaiin a zawna a vawi 4 nana Mizorama District Hospital fai leh thianghlim ber (Kayakalp Award) lawmman pakhatna a dawng leh chu chhuanawm a tih thu a sawi a. Health worker training-na, ANM School-in Mizoram Nursing Council exam-a result ṭha tak an nei ṭhin leh MNC exam hnuhnung bera Mizoram topper nei a, top 10-a mi pali lai an vawrh chhuak thei chu chhuanawm a tih thu a sawi.

Khuallian chuan District ralmuan nana thawktu District Police-te hma lakna fakin, foot & mobile patrolling an kalpui ṭhat avanga kum thum kal ta nen khaikhina dan bawhchhiatna a tla hniam ta hle chu lawmawm a tih thu a sawi a. Zu leh ruihhlo dona leh tihremna kawnga Excise & Narcotics hma lakna pawh fakawm a tih thu a sawi.

Khuallian chuan MGNREGA hnuaiah Lawngtlai District-ah job card 36,026 a awm mek thu leh kum 2022-23 sawrkar kum kal mekah ni 32 inhlawhna siam a nih tawh thu a sawi a. MGNREGA bakah, PMAY-G, MzSRLM leh DDU-GKY kal tlang te’n District chhung thingtlang mite chawi kan nan sawrkarin hma a lak reng thu a sawi.

Khuallian chuan line department hrang hrang kal tlanga SEDP hnuaia hma lakna kalpui mek bakah, School Education; Commerce & Industries; Agriculture; Fisheries; Horticulture; Animal Husbandry & Veterinary; Sericulture; Environment, Forests & Climate Change; Power & Electricity; Public Works; Taxation; Transport; Food, Civil Supplies & Consumer Affairs; Social Welfare; Treasury leh Information & Public Relations department hnuaia Lawngtlai District chhunga hmasawnna hna thawh leh hma lakna hrang hrangte a tar lang bawk.

A enkawl department – Sports & Youth Services, Tourism leh Information & Communication Technology hnuaia hma lakna tlangpui sawi chhunzawmin, Pu Robert Romawia Royte chuan sawrkarin Khamranga eco-tourism tihchangtlunna tur ₹ nuai 800 a hmuh thu te, kumin November-a Mizorama International Tourism Mart neih tur chuan Mizorama tourism a chawi kan a beiseiawm thu te leh Pilgrimage Rejuvenation and Spiritual, Heritage Augmentation Drive (PRASHAD) hnuaia Mizoram hmun hrang hranga tourism hmunhma buatsaihna tur ruahmanna chu Tourism Ministry-in a pawmpui tawh thu te a sawi a. ICT hnuaiah sawrkar hma lakna tihchak nan leh sawrkar leh mipui indawrna chak leh felfai zawk a awm theih nan te online portal siam ṭhin a nih thu te, hmun kilkhawr leh hnam tlem zawkte awmna hmuna sikul 20-ah smart classroom 40 peih fel a nih tawh thu leh BharatNet project hnuaiah thingtlang khaw 400-ah internet service ṭha an hmuh theih nan VSAT internet hub din a nih thu te a sawi.

Sports lama Mizoramin hmasawnna a neihte tar langin, Sports Minister chuan Commonwealth Games 2022-ah weightlifting-ah Tv. Jeremy Lalrinnunga’n gold medal a lak thu leh India hockey team-a tel Nl. Lalremsiami’n bronze medal a lak thu te, Khelo India Youth Games-a Mizoram Team-in gold medal 2, silver medal 1 leh bronze medal 1 an lak thu te a sawi a. Mizoram State Sports Council leh Rural Electrification Corporation te thawk dunin Lengpuiah ₹ vaibelchhe 10 senga sak tur Mizorama Motorsports Race Track hmasa ber tur hma an lak mek thu te, Kolasib Diakkawna Futsal ground leh Basketball court siamna tur leh Vaipuanpho-a adventure sports atana State Training Centre dinna tur Ministry of Tribal Affairs aṭangin hmuh a nih tur thu te a sawi a. PMJVK scheme aṭangin SYS leh ICT department hnuaia project hrang hrang 14 kal tlangin Lawngtlai District chhungah ₹ nuai 12,044.20 hu hmasawnna hna thawh chhoh mek a nih thu a sawi bawk.

Khuallianin thu a sawi zawh hian ceremonial parade lawmman sem nghal a ni a. Havard Higher Academy (Boys & Girls) chu pakhatna niin, pahnihna Vista English School (Boys & Girls) leh pathumna Lairam Higher Academy of Science (LAHAS) te an ni a. Mizoram Police armed contingent leh Don Bosco School NCC contingent te chu special participation prize leh parade contingent dang 15 chu participation prize hlan ni bawkin, parade commander SI TC Zirsanga leh khuang vawtute leh judge-te pawh lawmman siamsak an ni bawk.

Ceremonial parade lawmman bakah hian Independence Day 2022 pual hian a hnuaia mi ang hian chawimawina leh lawmman hrang hrang sem a ni bawk a, Khuallian Pu Robert Romawia Royte chuan a dawngtute kutah a hlan hlawm a ni.

1. I Can Foundation, Jaipur’s Humanitarian Excellence Award, 2021 dawngtu chawimawina:
Rev. V. Lalhmingsanga

2. Zirlai ti ṭha chawimawina:
1) Ruth C. Lalremsangi,
Lawngtlai College Veng,
BA (English) Topper
2) Cindy F. Lalhnehzuali,
South Lungpher,
BA (Public Administration) Top 2
3) C. Lalneihtluanga,
Sangau-III,
B.Sc (Geology) Top 6
4) K. Lalthansanga,
Lawngtlai New Vengpui,
B. Com Top 6
5) Lalrinmawii Khiangte,
Lawngtlai AOC Veng,
M.Sc (Chemistry) Top 6
6) T. Zothanpuii,
Lawngtlai AOC Veng,
MA (Education) Top 7
7) Tholehlalrindiki,
Sangau-IV Dinthar,
BA (Political Science) Top 8
8) H. Vanlalmuankimi,
Lawngtlai Bazar,
BSW Top 6
9) Lalrinngheti,
Lawngtlai Bazar,
BA (History) Top 8
10) Cindy Laltlanhlui,
Cheural,
ANM Top 7
11) Ellen Grace Chinzah,
Lawngtlai College Veng,
HSSLC (Hindi) Topper
12) Lalrinsangi,
Lawngtlai AOC Veng,
B. Tech Top 3
13) Hmingthantluangi Tlumang,
Lawngtlai College Veng,
M. Com Top 3
14) Ruth C. Lalchhanchhuahi,
Lawngtlai Chandmary,
M. Com Top 3

3. Church’s Auxiliary for Social Action (CASA)-in COVID-19 vaccine pek a kalpuinaa puitu ti ṭha zualte:
1) YLA Bazar Branch
2) YLA Chandmary Branch
3) MC Lalhriatmawii
4) Mimi K. Lalbiakhlui
5) Rebek Lalnunpuii
6) C. Lalruatchhungi
7) Lalremliani

4. Independence Day 2022 Badminton Tournament lawmman ṭhenkhat:
1) Under 13 Boys Singles
Champion: Liansangpuia, EBC
Runner Up: V. Vanmalsawma, EBC
2) Under 15 Girls Singles
Champion: Isabel Zoremsangi, BBC
Runner Up: V. Laldinsangi, EBC
3) Under 17 Boys Singles
Champion: Immanuel Malsawmdawngzuala, Chawngte BC
Runner Up: Braven M. Lalramropuia, Chandmary BC
4) 55+ Veteran Men’s Doubles
Champion: C. Hrangṭhianga CVBC &  Lalnunthanga CHBC

Vawiina Lawngtlaia Independence Day lawmnaah hian Sports & Youth Services, ICT & Tourism Board Vice Chairman Pu TC Pachhunga (Ex-MLA); LADC CEM Pu V. Zirsanga; LADC Chairman Pu VL Hmuaka; Lawngtlai West bialtu MLA Pu C. Ngunlianchunga; Sports & Youth Services Secretary Dr Lalrozama; Lawngtlai Bawrhsap Pu Amol Srivastava leh Lawngtlai SP Pu Rakesh Paweriya te bakah, LADC-a member eng emaw zat, state leh LADC official-te, ex-servicemen-te, tlawmngai pawl ai awhte, chanchinbu mite leh zirlai naupangte, lawmman dawngtute leh mipui ṭhahnem tak an tel a. Muala hun hman zawh hian LADC Conference Hall-ah LADC Chief Executive Member buatsaih ‘VIP At Home’ hun hlimawm tak hman chhunzawm a ni.

Kumin Independence Day lawmna pual hian Lawngtlai District Independence Day Celebration Committee chuan District Hospital Lawngtlai, Christian Hospital Lawngtlai, Lairam Christian Medical Centre & Hospital, Lairam Motherless Home, District Jail, Lairam Rescue Centre leh Gilead Drop-In Centre-ah te ṭanpuina ₹ 2,000/- ṭheuh an hlan a ni.

Issued by: I&PRO, Lawngtlai