Lawngtlaiah Faina Hapta 2022 kharna hun hman a ni

October ni 2 aṭanga ni 8, 2022 chhunga “Bawlhhlawh paih hmaa thliar hran (waste segregation at source)” tih thupui hmanga Lawngtlai District-a ‘Faina Hapta’ hman chu tukin zingkar khan Lawngtlai Bazar Venga Areopagy hmunah a kharna hun hman a ni.

 

Swachh Bharat Mission (Urban), Urban Development & Poverty Alleviation (UD&PA) Department, Lawngtlai District huaihawt Faina Hapta kharna hunah hian Lai Autonomous District Council (LADC)-a Local Administration Department changtu Executive Member Pu C. Rongura chu Khuallian a ni a. Faina Hapta chu kum tin hman a ni chungin duh anga hmasawnna hmuh tur tam lo deuhva a hriat thu sawiin, mipuite’n rilru thar pu a, faina leh thianghlimna kawngah hmasawnna thar neih tuma bul ṭan a ṭul a ni, a ti a. Lawngtlai chu District hmunpui chauh ni lova LADC hmunpui a nih tel avangin faina leh thianghlimna leh kawng tinrengah ram leh hnam darthlalang a ni a, a chhunga chengte paw’n mite entawn tlaka ke pen a pawimawh a ni, a ti a. Faina atan thinlung chhungril thianghlimna leh pawn lam thianghlimna a kal kawp tlat tih sawiin, bawlhhlawh paih mai mai lo va, a bawmah chauh paih leh, bawlhhlawh ṭawih thei leh ṭawih thei lo thliar hran chu bul ṭanna tur pawimawh tak a ni, a ti.

 

Faina Hapta kharna hun hi UD&PA, Lawngtlai District-a District Project Officer Pi TT Beikhaizi chuan a kaihruai a. Children Sanitation Club hnuaia hma la ṭha lawmman leh hnawm aṭanga thil insiamsiak (waste to art) lawmman sem niin, Lawngtlaia sawrkar department hrang hrangte’n bawlhhlawh bawm an thawh khawm chu sem a ni bawk a. Deputy Commissioner office staff te’n Right to Information chungchang leh sarang hman tlem chungchang lemchan (street play) an entir bawk.

 

He hunah hian LADC Executive Secretary Pu H. Lalruatkima bakah, state leh LADC official-te, VC member-te, Village Level Sanitation Committee member-te, Swachh Bharat Mission (Urban) Brand Ambassador leh Local Ambassador-te, tlawmngai pawl ai awhte, ANM School, Don Bosco School leh Ngurnunsangi English School zirtirtute leh zirlaite an tel a ni.

 

He hunah hian heti ang hian lawmman leh bawlhhlawh bawm sem a ni:

 

A. Children Sanitation Club hnuaia hma la ṭha lawmman:

1. AOC Veng aṭangin Lalremsiama s/o F. Lallawmfamkima

 

2. Bethel Veng aṭangin Lalruatfeli d/o Lalfamkima

 

3. College Veng aṭangin Julie Lalremruati d/o FC Lalhriatpuia

 

B. Waste to Art intihsiakna lawmman:

 

1st Prize: ANM School Eco Club Team No. 4

 

2nd Prize: Observation Home, Lawngtlai

 

3rd Prize: ANM School Eco Club Team No. 3

 

C. Bawlhhlawh bawm dawngtute:

1. Lawngtlai Vengpui

2. Council Veng

3. Bethel Veng

4. Chandmary

5. College Veng

6. AOC

7. Chawnhu

8. Central Young Lai Association

 

Issued by: I&PRO, Lawngtlai