AKAM lawmna kal zelah Lawngtlaia Fair Price Shop Retailer te endik a ni

Azadi Ka Amrit Mahotsav (AKAM) lawmna puala Sawrkar Laipui Ministry of Consumer Affairs, Food & Public Distribution ruahmanna angin vawiin khan Lawngtlai Bawrhsap leh District Civil Supply Officer (DCSO) te hma laknain Lawngtlai khawpui chhunga Fair Price Shop (FPS) Retailer te tlawh niin, an dinhmun enfiah a ni.

Lawngtlai Bawrhsap ai awhin Sub-Deputy Commissioner Pi Doris Lalrinawmi hovin FPS Retailer-te hi endik a ni a. DCSO office aṭangin Inspector of Food, Civil Supplies & Consumer Affairs Pu M. Vanlalduata leh District Programme Manager Pu C. Lalrinawma te’n an ṭawiawm a. Lawngtlai khawpui chhunga FPS retailer 10 – Thingkah A, Thingkah B, Lawngtlai-III A, Lawngtlai-III B, Bazar B, Council Veng A, Council Veng B, Lawngtlai-IV B, Lawngtlai-IV C leh College Veng A FPS-te an tlawh a ni.

Retailer-te hi an dawrah kal chilhin, sawrkarin an tih tura a tuk an ti em tih leh an zawm tur kaihhruaina a duante an zawm ṭha em tih te enfiah a ni a. Mipuiin sawrkar aṭanga hamṭhatna an dawn tur chanpual dik taka an chan theih nan retailer-te chu an mawhphurhna hrang hrang hrilh nawn an ni bawk a. An harsatna te zawh niin, a chin fel dan tur te sawi ho a ni bawk.

Issued by : I&PRO, Lawngtlai