Lawngtlaiah khawpui chhunga bawlhhlawh sawngbawl leh thliar hran chungchang sawi ho a ni

Vawiin khan Lawngtlai Bawrhsap Pu Amol Srivastava hovin Lawngtlai DC Conference Hall-ah Lawngtlai khawpui chhunga bawlhhlawh ṭawih thei lo chi sawngbawl leh thliar hran (solid waste management) kawnga hma lak dan tur hrang hrang sawi ho a ni a. He hunah hian state sawrkar leh LADC hnuaia a kaihhnawih department official-te leh education lam hotute, tlawmngai pawl leh kohhran ai awhte an tel.

 

Chairman, Lawngtlai Bawrhsap Pu Amol Srivastava chuan Mizoram Cleanliness Competition 2022-ah Lawngtlai khawpuiin Mizoram district hmunpuite zinga faina kawnga hmasawn chak ber lawmman, “Fastest Mover District Headquarters Award” a dawn chu state leh LADC hnuaia a kaihhnawih department-te bakah department dangte, VC, NGO, kohhran, zirna in, media leh mipuite thawh hona vang a ni tih sawiin, lawm thu a sawi a. Solid waste management chungchangah pawh theih tawpa ṭang tlang a, ke pen zel turin Lawngtlai mipuite a sawm a ni. 

 

He hunah hian UD&PA Lawngtlaia District Project Officer Pi TT Beikhaizi chuan kum hmasa lama hma lakna report pein, kum 2023 atana hma lakna tur hmachhawp leh hmabak awmte a chhawp chhuak a. Member kal khawmte chuan Lawngtlai khawpuiah faina kawnga hmasawnna tluantling a awm theih nana hma lakna tur rawtna hrang hrang siamin, an ngaihtuah ho a ni.

He hunah hian Lawngtlai khawpuiin bawlhhlawh ṭawih thei leh ṭawih thei lo paih hranna leh sawngbawlna hmun pangngai a neih thuai theih nan solid waste treatment plant leh wet waste treatment plant buatsaih tura hma lak mek a nih thu tar lan niin, bawlhhlawh thliar hran chungchang chu faina kawnga Lawngtlai khawpui mu tan ber a la nih avangin hmasawn theih dan tur sawi ho a ni a. Treatment plant peih fel a nih hmain bawlhhlawh thliar hran chu mipuiah inzirtir hmasak a ṭul tih niin, print media, social media leh tlangau kal tlang tea inzirtir bakah, zirna inah zirtirtute leh local ambassador-te’n zirtirna kalpuiin, kohhranah puangzar tur leh hma lakpui tura ngenna te siam ni se, tih a ni a. Khawpui chhunga in tin aṭanga bawlhhlawh khawn chungchangah bawlhhlawh ṭawih thei leh ṭawih thei lo khawn dan felfai zawk ruahman a nih theih nan LADC Sanitation Department-ah thlen ni se, tih a ni bawk.

 

Issued by: I&PRO, Lawngtlai